Shënim/ Ironia e Kryemadhit: "Dështuam në bërjen e Shqipërisë," por vijon të bëjë politikë

17 Maj 2019, 18:32, Aktualitet CNA

Në takimin me gjimnazistët e Tiranës, gjatë fjalës së saj kryetarja e LSI-së, Monika Kryemadhi, jo për të parën herë, kërkoi falje lidhur me faktin se klasa politike, ku përfshihet edhe ajo e bashkëshorti Ilir Meta, ka dështuar në bërjen e Shqipërisë europiane.

Falja e Kryemadhit erdhi ndërsa dëgjoi shqetësimet e gjimnazistëve pjesëmarrës dhe pas një autokritike ndaj vetes dhe politikanëve të tjerë që kanë qenë aktor veprues në rrugëtimin mëse tre dekadash të Shqipërisë.

?Ne dështuam në bërjen e Shqipërisë por, duhet t?ju japim ju kurajon që ta bëni atë Shqipëri që duhet. E them këtë me bindjen e plotë sepse në 30 vite tranzicion ia kam kushtuar të rinjve por edhe atyre që nuk janë sot këtu, janë në emigracion.Kur merresh me politikë bëhesh indeferente e problemeve të moshës ku nuk ndodhesh vetë. Largimi i të rinjve është këmbanë alarmi. Statistikat tregojnë se janë 500 mijë shqiptarë që kërkojnë të largohen.?

Ishte thelbi i artikulimit të Monika Kryemadhit, duke mos përmendur asgjë më tepër lidhur me daljën jashtë loje të kësaj kaste politike, që prej tre dekadash e ka mbërthyer tavën e pushtetit dhe nuk e lëshon.

Sepse nuk mund të bëhet Shqipëria perëndimore për të cilën endërrojnë gjimnazistët etj., pa u larguar politikanët që dështuan në realizimin e këtij misioni të shprehur në fillimvitet ’90 me parrullën “Ta bëjmë Shqipërinë si gjithë Europa”. Tek ta hynë edhe Monika Kryemadhi dhe bashkëshorti i saj Ilir Meta, që pas lënies së stafetës së kryesimit të LSI-së tek Kryemadhi po mban me kthetra presidencën.

Që të realizohet bërja e Shqipërisë duhet ti hapet rruga e hyrjes në lojën politike të rinjve gjimnazistë e më tej, jo duke patur si preferencë shërbestarinë ndaj lidershipit, e qënien pjesë e tarafit politik, por konkurencën me bazë aftësitë individuale. Kjo gjë as ka ndodhur dhe as ka për të ndodhur për sa kohë Kryemadhi dhe raca e politikanëve që dështuan në bërjen e Shqipërisë të vijojnë të jenë në tavën e politikës dhe qeverisjes.

Që të realizohet bërja e Shqipërisë që endërrojnë gjimnazistët e më tej, duhet të bëhet realitet, më së pari, thelbi i frazës biblike: “Largoni majanë e vjetër që të bëni brum të ri”. Gjë që është e papranueshme për Kryemadhin dhe gjithë klasën e politikanëve brumi i të cilëve është gatuar me majanë e vjetër, që ka hidhëruar shijet perëndimore të miliona shqiptarëve të zhgënjyer. / CNA.al