Ironia e Ramës pas rekomandimit/ "Patetizëm naiv e krekosje idiote..."

19 Prill 2018, 18:52, Aktualitet CNA

Rekomandimi pa kushte për hapjen e negociatave për anëtarësim në Bashkimin Evropian për Shqipërinë, ka sjellë një mori reagimesh nga e gjithë klasa politike.

Ndërsa maxhoranca e shikon si një arritje të madhe rekomandimin pa kushte të KE për hapjen e negociatave, opozita e sheh me sy kritik dhe shprehet se pavarësisht se ky është një lajm i mirë për Shqipërinë, duhet pritur qershori për të mësuar nëse do të hapen apo jo.

Në vazhdën e këtyre reagimeve, nënkryetari i LSI-së, Luan Rama, ka ironizuar me “jehonën” që maxhoranca po i jep kësaj ngjarje.

Nëpërmjet një postimi në rrjetet sociale, Luan Rama shprehet: “përse kaq shumë zhurmë mburrjesh naive e idiote po aq, aq sa edhe zyrtarë të shtetit e deputetë flasin për çelje apo hapje të negociatave, për ditë historike, për ngjarje të madhe e të tjera si këto, kur vendimi nuk është marrë ende, e madje nuk dihet a do të merret më 28 qershor?!”

Postimi i plotë:

Absurdi i një feste dhe negociatat e paçelura!

Delir, ekstazë, fjalime me tone festive, patetizëm naiv e krekosje idiote, konferenca shtypi, blice aparatesh, kamera gjithkund e kameramanë që shtyhen, sekush për të mos humbur shansin për të fiksuar çdo detaj apo grimasë, njerëz të gëzuar që nuk e dinë se përse, raporte që dorëzohen zyrë më zyrë prej të njejtës dërgatë si një vit më parë e sipas një rituali të rëndomtë e grotesk, fjalime në parlament, e përsëri shterngime duarsh, konferenca shtypi, deklarata, pozime fallco para kamerave, grimasa, buzeqeshje, nënqeshje, ngërdheshje, përqeshje!…

Kjo është atmosfera e Tiranës zyrtare këto ditë, kinse prej një raporti dhe rekomandimit të Komisionit Europian për Këshillin Europian, ku më 28 qershor, ministrat e punëve të jashtme të vendeve anëtare të Bashkimit Europian do të duhet të marrin vendim, për t?i çelur ose jo negociatat me Shqipërinë!

Dhe që kjo të bëhet e mundur, pra që negociatat të çelen, duhet që në Këshillin Europian të mos ketë asnjë votë kundër!

Atëherë përse gjithë kjo festë? Përse kaq shumë zhurmë mburrjesh naive e idiote po aq, aq sa edhe zyrtarë të shtetit e deputetë flasin për çelje apo hapje të negociatave, për ditë historike, për ngjarje të madhe e të tjera si këto, kur vendimi nuk është marrë ende, e madje nuk dihet a do të merret më 28 qershor?!

Sepse, për dreq edhe një vit më parë kështu ndodhi; Komisioni Europian i rekomandoi Këshillit çeljen e negociatava me Shqipërinë, raporti u dergua me dërgatën njësoj si këtë herë zyrë më zyrë prej Kryeministrit, Presidentit e me rradhë tek të tjerët, por Këshilli nuk e miratoi rekomandimin!

Festë absurde e qesharake për një vendim që ende nuk është marrë!

Shqiptarët duhet ta dinë: nuk janë çelur ende negociatat e BE-së me Shqipërinë! Ka vetëm një rekomandim, rutinë e punës së Komisionit, vendimi për të cilin merret me 28 qershor!

Ndaj, me shpresën që Këshilli Europian t?a miratojë rekomandimin e Komisionit Europian për çeljen e negociatave me Shqipërinë, na e kurseni festën, na e kurseni zhurmën mburramane dhe idiotësinë e deklaratave të denja vetëm për frekuencat e paligjshme të ERTV!

E, për ta kuptuar më mirë absurdin e kësaj feste idiote e zhurme të pakuptimtë, ia vlen t?ju sjell në vëmendje disa vargje nga poema e Ismail Kadaresë ?Tirana në dimër?:

?Mesdita ia beh, si grua e dehur tapë.

Temperatura e dollari zbresin prap.

Po shqyhen celularët: okej, shkërdhatë,

Rrofsh, je yll bote, e tung, e top, e trap.

A shqip është kjo llahtarë apo dreqnisht?

Për gjithçka flitet, heshtet për gjithçka.

Ja të dy palët, xhelatë, viktima e ish,

Kujtime shkruajnë netëve me mllefe të mëdha.

Po ç?është ky popull që në gropë i shtrirë

Kujton aq krenarisht se është në majë?? /CNA.al