KLSH kallëzon në Prokurori regjistruesin dhe katër specialistë të ZVRPP Gjirokastër

18 Qershor 2016, 18:01, Aktualitet CNA

Regjistruesi i Zyrës Vendore të Regjistrimit të Pasurive të Paluajtshme Gjirokastër F.H, specialisti hartograf E.B dhe 3 ish-specialistët e ZVRPP Gjirokastër K.J, A.ZH dhe J.A janë kallëzuar penalisht nga Kontrolli i Lartë i Shtetit. Mësohet se ata akuzohen për shpërdorim detyre.

Përmes një njoftimi për mediat, KLSH bën me dije se gjatë auditimit të Zyrës Vendore të Regjistrimit të Pasurisë së Paluajtshme Gjirokastër për periudhën 2012- 2015, ka konstatuar një sërë shkeljesh të dispozitave ligjore, për të cilat janë rekomanduar masat përkatëse për përmirësimin e gjendjes dhe nxjerrjen e përgjegjësive, të miratuara me Vendimin e Kryetarit të KLSH-së me nr. 51, datë 13.05.2016.

?Kanë kryer regjistrime të pasurive me sipërfaqe më tepër nga ajo e përcaktuar në Ligj, në 110 raste kanë lëshuar çertifikata mbi këto pasuri dhe 103 raste kanë lejuar tjetërsimin e këtyre pasurive, duke i shkaktuar Buxhetit të Shtetit 16 milion lekë dëm ekonomik, si dhe kanë refuzuar në mënyrë të paligjshme regjistrimin e pasurive të komuniteteve fetare? thuhet në njoftimin e KLSH-së

Ja disa nga shkeljet kryesore të konstatuara nga KLSH

Në 6 raste janë regjistruar 1294 m2 sipërfaqe trualli më tepër nga ajo e përcaktuar sipas listës së trojeve dhe janë lëshuar certifikata pronësie mbi këto sipërfaqe.

Në 4 raste, janë kryer veprime tjetërsimi nëpërmjet transaksioneve mbi këto pasuri, si shitje, pjesëtim pasurie dhe regjistrim dëshmi trashëgimie.

Është shkaktuar dëm ekonomik ndaj Bashkisë Gjirokastër dhe Buxhetit të Shtetit në vlerën 16,048,170 lekë, si qera e munguar nga përdorimi i jashtëligjshëm e pa titull pronësie të trojeve, nga të cilat 15,467,670 lekë për përdorimin e paligjshëm të 585.9 m2 truall në pronësi të Bashkisë Gjirokastër dhe 572,400 lekë për përdorimin e paligjshëm të 143.1 m2 truall në pronësi të shtetit.

Është refuzuar pa bazë ligjore regjistrimi i pasurive të Kryegjyshatës Botërore Bektashiane, në kundërshtim me Ligjin nr. 10058, datë 22.01.2009 ?Për ratifikimin e Marrëveshjes ndërmjet Këshillit të Ministrave të Republikës së Shqipërisë dhe Kryegjyshatës Botërore Bektashiane për rregullimin e marrëdhënieve të ndërsjella?.

Nuk ka një evidencë dhe nuk njihet e raportohet gjendja e pasurive të regjistruara me mbivendosje, mungojnë hartat e pasurive të identifikuara me mbivendosje dhe për pasojë është lejuar regjistrimi me mbivendosje në favor të personave të tretë të 40 pasurive me sipërfaqe totale 17100,9 m2 të llojit truall dhe ndërtesa, pasuri në pronësi të Kryegjyshatës Botërore Bektashiane, kthyer në VKKP nr. 134, datë 13.3.2008.

Në 109 raste nuk është veçuar dhe regjistruar ?shtet? sipërfaqja prej 52.849 m2 dhe nuk janë kryer veprime në Kartelat e Pasurive të Paluajtshme, ndërsa në 110 raste me sipërfaqe totale 20.503 m2, janë kryer veprime me pasojë tjetërsime të sipërfaqeve.

Konstatohet performancë e ulët në administrimin e praktikave, të cilat për një periudhë 5 vjeçare arrijnë mbi 3287 praktikadhe për të cilat ZVRPP, ndonëse ka arkëtuar nga qytetarët rreth 9.9 milion lekë, ende nuk iu ka ofruar atyre shërbimin e kërkuar, me pasojë mungesë transparence ndaj publikut.

Konstatohet mungesë bashkëpunimi ndërmjet ZVRPP dhe Komisionit Vendor të Verifikimit të Titujve të Pronësisë, që ka sjellë si pasojë nivele të ulëta të regjistrimit të pasurive bujqësore, pranimin e dokumentacionit dhe regjistrimin e pasurive të paluajtshme me të meta dhe mangësi.

Shkeljet e konstatuara më sipër janë në kundërshtim me përcaktimet ligjore e nënligjore të bëra në Ligjin nr. 33/2012, datë 29.04.2012 ?Për regjistrimin e pasurive të paluajtshme?, Ligjin nr. 8752, datë 26.3.2001 ?Për krijimin dhe funksionimin e strukturave për Administrimin dhe Mbrojtjen e Tokës?, Ligjin nr. 7501, datë 19.7.1991 ?Për tokën?, Ligjin Nr. 9154, datë 06.11.2003 ?Për arkivat? dhe Rregulloren nr. 207, datë 11.06.2007 ?Për arkivimin e dokumenteve tekniko-ligjore në ZVRPP?.