Ku ka humbur Gjergj Bojaxhi ?

23 Shkurt 2016, 11:11, Aktualitet CNA

Ish-drejtori i Kompanisë Energjitike, Gjergj Bojaxhi, ka qenë një zë i fortë mbrojtës për të drejtat e qytetarëve të kryeqytetit gjatë zgjedhjeve lokale të vitit 2015. Ai kandidoi për kreun e Bashkisë së Tiranës, ku mori një numër të konsiderueshëm votash.

Për gati 8 muaj, Bojaxhi u zhduk nga ekranet televizive, deri përpara disa javësh ku me një njoftim në rrjetet sociale paralajmëroi krijimin e një force të re politike. Por, vetëm kaq. Ai u zhduk përsëri nga skena politike.

Bojaxhi ka qenë një mbrojtës i fortë i mjedisit, në veçanti i Parkut të Liqenit, ku ka zhvilluar një pjesë të mirë të fushatës së tij. Ai ka denoncuar disa herë ndërtimet që janë kryer dhe po kryeheshin tek Parku i Liqenit Artificial. Ende Gjergj Bojaxhi, nuk ka thënë asnjë fjalë për betoniziminin që po i bëhet Parkut të Liqenit me ndërtimin e të ashtëquajturit ?Këndi i Lojërave?.

Ai nuk është përfshirë në asnjë moment në debatin për rritjen e taksave të Bashkisë së Tiranës, edhe pse i ka kundërshtuar fort në fushatën elektorale për Bashkinë e Tiranës.

Ish anëtari i Partisë Demokratike, arriti të bindte mijëra qytetarë të kryeqytetit, ta votonin atë si një figurë ndryshe e politikës Shqiptare. Por, pse nuk po flet sot Gjergj Bojaxhi për aferat korruptive të qeverisë me koncesionet, për rritjen e taksave, për mbrojtjen e mjedisit. Ku ka humbur kandidati premtues ? Politika po kalon një moment të vështirë për ngërcin e reformës në drejtësi si dhe për zbatimn e ligjit të dekriminalizimit. Për të gjitha problemet që po kalon vendi dhe për problemet e qytetarëve, jo vetëm të kryeqytetit, Gjergj Bojaxhi nuk ka thënë asnjë fjalë.

A po përdoret Gjergj Bojaxhi për të thithur vota të djathta?

Heshtja e Gjergj Bojaxhiut dhe paralajmërimi për krijimin e një force politike, por që ende nuk ka asgjë konkrete, mund të lidhet me prapavija dhe strategji politike. Nuk kanë qenë të pakta rastet kur politikanë dhe media e kanë rreshtuar Bojaxhiun si ushtar të qeverisë, për të mbledhur sa më shumë vota të djathta, me qëllim dobësimin e Partisë Demokratike.

Bojaxhi e nisi fushatën e tij për fushatën elektorale të vitit 2015 me denoncime të forta për mënyrën se si po trajtohej kryeqyteti nga Bashkia. Deri në ditën e fundit ai vijoi denoncimet e forta për abuzimet me cështjet mjedisore, por sot, kur bashkia drejtohet nga Erion Veliaj dhe po akuzohet nga shoqëria civile dhe nga opozita për betonizimin e Parkut të Liqenit, Gjergj Bojaxhi po hesht. Kjo heshtje flet për të vërtetat e pathëna publikisht të Gjergj Bojaxhiut./citynews