80-vjetori i Partizanit, presidenti Demi: E mbajta premtimin, shteti të kthejë sytë nga sporti

5 Shkurt 2026, 10:13, Sport CNA

80-vjetori i Partizanit, presidenti Demi: E mbajta premtimin, shteti të

Partizani festoi 80-vjetorin e krijimit të tij, një përvjetor i rëndësishëm në historinë e futbollit shqiptar.

Me këtë rast, presidenti i klubit, Gazment Demi, mbajti një fjalim përpara përfaqësuesve të institucioneve sportive, shtetërore dhe familjes së gjerë të kuqe.

Në fjalën e tij, Demi u ndal te rrugëtimi historik i klubit dhe zhvillimet e dekadës së fundit. Ai evidentoi realizimin e projektit të stadiumit dhe kompleksit sportiv, si një hap kyç për të ardhmen e Partizanit.

U theksua gjithashtu roli i familjes, partnerëve institucionalë dhe Federatës Shqiptare të Futbollit në këtë proces. Po ashtu u ngrit edhe çështja e nevojës për mbështetje më të strukturuar shtetërore për sportin përmes politikave të sponsorizimit.

Fjalimi i presidentit Demi:

Të nderuar miq të Klubit të Futbollit Partizani, të nderuar drejtues të Federatës Shqiptare të Futbollit, të nderuar përfaqësues të qeverisë dhe parlamentit, të nderuar anëtarë të familjes së madhe Partizani.

Sot është një ditë e veçantë për klubin tonë, sepse festojmë 80 vite krenari, 80 vite sakrifice, por edhe shumë dashuri dhe emocion për një klub legjendë të futbollit shqiptar. Partizani nuk është vetëm një klub futbolli; është një identitet, një traditë, është një emër që është ndërtuar nga breza të tërë sportistësh, trajnerësh dhe drejtuesish. Por ky përvjetor është krejt i veçantë. Para 10 vitesh, kur festonim 70-vjetorin në Pallatin e Kongreseve, dhashë një premtim: shumë shpejt do të kishim shtëpinë tonë. Sot, ky premtim është bërë realitet. Sot, Klubi i Partizanit ka një stadium modern, një hotel me 48 dhoma dhe një standard me 5 yje, dhe jo më kot festën për këtë përvjetor e bëmë në shtëpinë tonë. Projekti ende nuk ka përfunduar, por me dritën jeshile të dhënë nga Qeveria Shqiptare, që ato karakatinat që patë kur hytë në kompleks të kthehen në fusha futbolli për rritjen e fëmijëve, mendoj se shumë shpejt ky kompleks do të marrë formën përfundimtare dhe do të jetë një destinacion i rëndësishëm i jetës sportive, jo vetëm për qytetin, por edhe për rajonin.

Të gjithë e dinë që unë, te Partizani, kam gjetur vetëm një logo dhe disa borxhe, padyshim edhe shumë histori, por të tilla vepra kërkojnë sakrificë për t’u ndërtuar nga fillimi. Prandaj dua të evidentoj kontributin e familjes Demi, që më ka mbështetur që nga momenti i parë, ndihmën e pakushtëzuar të familjes Gjoka, partneritetin e rëndësishëm të Federatës Shqiptare të Futbollit dhe, patjetër, qeverisë, falë së cilës më në fund Partizani ka ambientet e veta, ku mund të zhvillojë dhe edukojë breza. Sot, te Klubi i Partizanit janë plot 11 ekipe futbolli që zhvillojnë aktivitetin e tyre, dy prej tyre janë ekipe të futbollit të vajzave. Akademia Partizani është kthyer në një burim për ekipet kombëtare. Por, duke përfituar nga rasti që kemi edhe politikanë të pranishëm, dua të theksoj se këto shkolla futbolli nuk mund të zhvillohen duke qenë ne, si biznesmenë, të vetëm në këtë iniciativë. Shteti duhet të na krijojë kushtet që biznesi të kthejë sytë nga sporti. Ligji i Sponsorizimit ende nuk është bërë realitet. Edhe Kosova është përpara nesh. Për të ndërtuar strategji zhvillimi duhet të bëhemi bashkë: biznes – qeveri – federatë, me qëllim që ne që investojnë në sport të mos na quajnë të çmendur.

Gjithsesi, sot të festojmë dhe ju ftoj të gjithëve të shijoni mbrëmjen e sotme në shtëpinë tonë të re.