web counter
LEXO PA REKLAMA!

SHKARKO APP

App Store
Google Play

E fundit!

x

Vatra e dytë e murtajës në qarkun e Korçës/ Rrezik i shtuar në fermat e zonës së Maliqit

24 Qershor 2025, 17:33, Sociale CNA

Vatra e dytë e murtajës në qarkun e Korçës/ Rrezik i

Një vatër e dytë e murtajës është konfirmuar zyrtarisht në qarkun e Korçës, këtë herë në fshatin Shkozë të bashkisë Maliq. Sipas të dhënave paraprake, bëhet fjalë për një fermë në pronësi të shtetasit Enkel Shkëmbasi, ku rreth 19 krerë bagëti të imta do të asgjësohen për të frenuar përhapjen e sëmundjes.

Në zonë rezultojnë të rrezikuar shumë krerë të tjerë, ndërsa perimetri i vëzhgimit shtrihet në një distancë nga 3 deri në 10 kilometra. Adriatik Skënderasi nga Shërbimi Veterinar konfirmoi se analizat laboratorike dolën pozitive për murtajë dhe se masat për asgjësimin e tufës problematike kanë nisur menjëherë. Deri më tani, në këtë fermë janë regjistruar edhe 20 kafshëve të ngordhuta, të cilat janë groposur ditën e djeshme. Në total, dëmi llogaritet në mbi 40-50 milionë lekë të vjetra.

“Aktualisht kemi vatrën e dytë në qarkun e Korçës. Kemi 2-3 ditë, dërguam analizat dhe u konfirmuan pozitivë me murtajë. Sot po kryejmë eleminimin. Ndodhemi në fshatin Shkozë të Maliqit, ku do të eleminohen gati 190 krerë të imëta, dele dhe dhi. Gjatë dy ditëve kemi edhe 20 ngordhje, të cilat u groposën dje dhe janë rreth 211 krerë dëm në këtë fermë. Rreziku është prezent, ne kemi përcaktuar zonën 3-10 km. Në 3 km përfshin fshatrat Zboq, Novoselë, Symizë, Këmbëthekër dhe Shkozë. I kemi porositur të gjithë fermerët mos kalojnë në këtë zonë. Analizat u morën pardje, përgjigjia erdhi dje pozitive dhe sot filluam eleminimin. Do marrim edhe të tjera për konfirmim nëse kemi dyshime, por aktualisht nuk kemi. Dëmi është i madh, 40-50 milionë lekë të vjetra po. Të gjithë fermerëve jo vetëm të Korçës por gjithë Shqipërisë tre gjëra u them. Mos blini kafshë nga origjina që nuk i dihet. Mos i levizni kafshët nga ferma juaj në fermë tjetër. Mos nxirrni e mos merrni kafshë në treg. Lejohen vetëm kafshë të cilat kalojnë në therrtore, duke u kontrolluar nga veterineri. Të gjithë janë në terren, sidomos sot është krehur gjithë zona. Risku është prezent dhe e vetmja masë është mos të kemi kontakt me këtë fermë”,-tha Skënderasi.

Zyrtarët lokalë kërkojnë bashkëpunim maksimal nga fermerët dhe marrjen seriozisht të situatës. Kryetari i Bashkisë Maliq, Gëzim Topçiu, i pranishëm në terren, theksoi rëndësinë e ndalimit të çdo lëvizjeje të blegtorisë, për të shmangur përhapjen e mëtejshme të murtajës.

“Është lajm i trishtë, shpresoj që të jetë e para dhe e vetmja.  Unë po shkoj vetë në vendngjarje për ta parë sitiatën dhe për të sensibilizuar dhe për të dhënë mesazhet për lëvizje sa më të pakta, për blerje sa më të pakta të blegtorisë në këtë moment edhe të shpresojmë që kjo të mos hapet në zona të tjera.  Kjo është një zonë që mban dele, dhinë dhe vetë komuniteti i këtyre zonave mbahet me këto bagëti ndaj të shoresojmë që dëmet të jenë sa më të pakta.  Patjetër ne si pushtet lokal, por edhe qeveria do të ketë mbështetje për të gjitha rastet.  Ne qëndrojmë në komunikim të vazhdueshëm me Ministrinë e Bujqësisë, me zëvendësministrin që mbulon këtë sektor, me prefektin e qarkut, dhe të gjitha instancat. Të shpresojmë që të minimizohen. Ne jemi në ndjekje të situatës pasi kemi bërë takime me kryetarët e fshatrave, drejtuesit e njësive administrative me blegtorë për të bërë lëvizje sa më të pakta për të mos bërë blerje vend e pavend, por të ndalohet blerja në këtë moment në mënyrë kategorike, mos lëvizin tufat nga njëra zonë tek tjetra. Ka një udhëzim të veçantë për këtë punë, që e kemi diskutuar, e kemi bërë prezent, të shpresojmë që fjala edhe ajo çfarë Ministria e Bujqësisë ka rekomanduar të merret në konsideratë nga të gjithë. Të gjitha masat i kemi marë, shpresojmë që të gjithë të mos e marin si një lojë, por ta marin me seriozitet më të madh pasi është në shërbim të të gjithëve”,-tha Topçiu.

Autoritetet vijojnë monitorimin intensiv të zonës dhe paralajmërojnë se çfarëdo lloj neglizhence apo thyerje e udhëzimeve do të rrisë ndjeshëm rrezikun për përhapjen e sëmundjes në zona të tjera të qarkut dhe më gjerë./CNA





Lajmet e fundit nga