Ballokume tradicionale/ Sekreti për të përgatitur ëmbëlsirën simbol të Ditës së Verës

14 Mars 2026, 08:45, Shëndeti CNA

Ballokume tradicionale/ Sekreti për të përgatitur

Ballokumja është një ëmbëlsirë tradicionale shqiptare që lidhet ngushtë me festën e Dita e Verës.

Dita e Verës/ Pak nga origjina e festës pagane, zakonet dhe ëmbëlsira tradicionale
14 Mars, 08:37

E ka origjinën nga qyteti i Elbasanit dhe përgatitet prej shumë brezash sipas një recete të veçantë tradicionale. Kjo ëmbëlsirë përgatitet kryesisht me miell misri, gjalpë, sheqer dhe vezë, të cilat përzihen me kujdes për të krijuar një brumë të butë dhe aromatik.

Një nga veçoritë e përgatitjes së ballokumes është përdorimi i “finjës”, një përbërës tradicional që ndihmon që ëmbëlsira të bëhet më e shkrifët. Pas përgatitjes së brumit, ballokumet formohen në toptha dhe piqen në furrë derisa të marrin një ngjyrë të artë.

Sot ballokumja mbetet një simbol i traditës dhe festimit në familjet shqiptare, sidomos gjatë Ditës së Verës.

Përgatitja e ballokumeve të Elbasanit në shtëpi

Përbërësit:

1 kg sheqer (jo i bluar)

1 kg mielli misri i situr

500 gr gjalpë i freskët (sipas këshillës së amvisave të Elbasanit gjalpi duhet të jetë dhie)

8 kokrra vezë

Gjysmë filxhani kafeje me ujë finje (përgatitet përmes hedhjes së dy-tri lugë gjelle nga hiri i zjarrit në një gotë me ujë, e cila lihet përreth 30 minuta dhe më pas kullohet me kujdes)

Përgatitja

Si fillim, në enën e bakrit apo qelqit hidhet sheqeri dhe gjalpi i shkrirë, temperatura e të cilit duhet të jetë e vakët.

Përzihet përmes një luge druri përreth 40-45 minuta derisa masa të bëhet kremoze.

Më pas shtojmë një vezë dhe vijojmë përzierjen me lugë druri. Shtojmë vezën e dytë dhe vijojmë përzierjen me lugë druri, vijojmë po kështu me vezën e tretë e me radhë.

Vijojmë pa ndërprerje përzierjen ndërsa shtojmë ujin e finjës ose në mungesë të tij shtojmë pak qumësht.

Shtoni miellin e misrit me dorë gradualisht duke vijuar pa ndërprerje përzierjen me lugë druri derisa të keni mbaruar gjithë masën e miellit.

Trazohet fort me lugë druri që të mos krijohen kokrriza dhe masa të bëhet krejtësisht e njëtrajtshme.

Masa nis të punohet me dorë derisa brumi të jetë aq i plotë sa të mos rrafshohet kur e mban në dorë.

Brumi ndahet në copa të cilave u jepet forma e rrumbullakët. Më pas vendosen në një tavë të lyer me gjalpë dhe pudrosur me miell misri. Ballokumet vendosen me një distancë nga njëra-tjera pasi vëllimi i tyre do të rritet gjatë pjekjes.

Vendoset në furrë të parangrohur në temperaturën 180-200 gradë./CNA