web counter
LEXO PA REKLAMA!

SHKARKO APP

App Store
Google Play

Studimi, lëvizshmëria e spermës arrin kulmin në verë, bie në dimër

25 Shkurt 2026, 22:29, Shëndeti CNA

Studimi, lëvizshmëria e spermës arrin kulmin në verë,

Një studim i ri ndërkombëtar ka zbuluar se cilësia e spermës, veçanërisht lëvizshmëria e saj, është më e lartë gjatë muajve të verës dhe më e ulët në dimër.

Hulumtimi, i publikuar në revistën shkencore Reproductive Biology and Endocrinology, analizoi mostrat e spermës nga 15,581 burra të moshës 18 deri në 45 vjeç në Danimarkë dhe Florida (SHBA). Studimi u realizua nga studiues nga Mbretëria e Bashkuar, Kanadaja dhe Danimarka.

Sipas rezultateve, lëvizshmëria e spermës – aftësia e saj për të “notuar” në mënyrë efektive drejt vezës – ishte vazhdimisht më e lartë në muajt qershor dhe korrik, si në klimën e freskët të Danimarkës ashtu edhe në klimën e ngrohtë të Floridës. Në të kundërt, nivelet më të ulëta u regjistruan në dhjetor dhe janar.

Megjithatë, studiuesit nuk gjetën ndryshime sezonale në përqendrimin total të spermës apo në vëllimin e ejakulatit. Kjo do të thotë se numri i spermatozoidëve të prodhuar mbetet i qëndrueshëm gjatë vitit, por aftësia e tyre për të lëvizur ndryshon sipas stinëve.

Profesori Allan Pacey nga Universiteti i Mançesterit, bashkautor i studimit, tha se rezultatet ishin befasuese për shkak të ngjashmërisë së modelit sezonal në dy klima shumë të ndryshme.

“Edhe në Florida, ku temperaturat mbeten të ngrohta gjatë gjithë vitit, lëvizshmëria e spermës arrinte kulmin në verë dhe binte në dimër. Kjo sugjeron se vetëm temperatura e ambientit nuk i shpjegon këto ndryshime,” u shpreh ai.

Studiuesit theksojnë se temperatura optimale e testikujve duhet të jetë 2 deri në 4 gradë më e ulët se temperatura mesatare e trupit (37°C), pasi devijimet nga kjo mund të ndikojnë negativisht në lëvizshmërinë e spermës dhe, rrjedhimisht, në fertilitet.

Sipas ekspertëve, kuptimi i këtyre modeleve sezonale mund të ndihmojë në përmirësimin e trajtimeve të fertilitetit dhe në optimizimin e kohës së testimeve për çiftet që po përpiqen të kenë fëmijë./ CNA





Lajmet e fundit nga