Zgjedhjet e 11 majit/ Berisha paralajmëron Ramën: Nuk do të qëndrosh në pushtet me këtë farsë

20 Maj 2025, 12:58, Politikë CNA

Zgjedhjet e 11 majit/ Berisha paralajmëron Ramën: Nuk do të

Kreu i Partisë Demokratike, Sali Berisha, foli me tone të ashpra në konferencën e sotme të mbajtur në selinë e PD-së, nga ku deklaroi se zgjedhjet e 11 majit ishin një farsë. Berisha paralajmëroi kryeministrin Edi Rama se nuk do të qëndrojë në pushtet në këtë mënyrë.

Berisha tha se 11 maji u dëshmoi shqiptarëve se me Edi Ramën në qeveri nuk ka kurrë zgjedhje të lira.

Sipas Berishës, është në detyrën e shqiptarëve që të mbrojnë e të ngrihen me gjithë forcën për të votuar si qytetarë të lirë në një vend si Shqipëria.

“Është shkelur në çdo nen dokumenti themelor ndërkombëtar, njëlloj edhe Kushtetuta e Shqipërisë. Se këto Kushtetuta i ka, por unë mora sot t’u paraqes dokumentin ndërkombëtar, të detyrueshëm për të gjitha vendet. Ndalohet çdo lloj intimidimi i zgjedhësve. Siç e shihni, të gjitha parimet themelore ndërkombëtare janë dhunuar në mënyrë të pamëshirë.

PD disponon qindra dhe mijëra dokumente për të faktuar farsën e turpshme të 11 majit që zhvilloi Edi Rama, duke shkelur nen për nen dokumentin e Kopenhagenit për të drejtat e njeriut dhe zgjedhjet e lira. Dhe unë e njoftoj Edi Ramën se në mënyrë absolute, pushteti mbi këtë farsë nuk mund të qëndrojë, se karrigia e tij dhe enturazhit të tij qëndron mbi megakrimin elektoral apo farsën më të shëmtuar që Europa ka pasur pas rënies së Perdes së Hekurt në ndonjë vend si Shqipëria. Gjykova të paraqes para shqiptarëve direktivën, parimet ndërkombëtare të zgjedhjeve të lira, të cilat u shkelën një për një. Dhe të cilat, për çdo njeri që beson te liria dhe dinjiteti njerëzor, se gjithçka ka të bëjë me dinjitetin, 11 maji ishte një farsë, më e turpshmja në historinë e qytetarëve shqiptarë.

11 maji u dëshmoi shqiptarëve se me Edi Ramën në qeveri nuk ka kurrë zgjedhje të lira.

Dhe se është në detyrën e tyre, në guximin e tyre, në dinjitetin e tyre, të mbrojnë, të ngrihen me gjithë forcën për të votuar si qytetarë të lirë në një vend si Shqipëria”,-tha Berisha./CNA