E fundit!

11:43 Aktualitet

Vrau me thikë fqinjin/ Gjykata e Durrësit cakton masën e sigurisë për 25-vjeçarin

Gjykata e Durrësit ka caktuar masën e sigurisë “arrest në ...

Paralajmëron Këlliçi: Me Jet Bank po shtohet një tjetër pengesë për procesin e integrimit

23 Prill 2026, 16:17, Politikë CNA

Paralajmëron Këlliçi: Me Jet Bank po shtohet një

Deputeti i Partisë Demokratike, Belind Këlliçi, vijon me denoncimin për Jet Bank.

Këlliçi thekson se me Jet Bank po shtohet një tjetër pengesë në procesin e integrimit të Shqipërisë në BE.

Deputeti nënvizon se akte të tilla si licencimi pa transparencë i bankës digjitale Jet Bank, nuk do të kalojë pa pasoja dhe se BE kërkon procedurë rigoroze në këtë drejtim.

Këlliçi paralajmëroi se qeveria shumë shpejt do ta marrë përgjigjen për këtë çështje.

Ai theksoi se do ta ndjekë këtë çështje me përkushtim derisa të zbulojë të vërtetën se kush fshihet pas vendimit për licencimin e kësaj banke.

“Me Jet Bank, po shtoni një pengesë tjetër në procesin e integrimit!

Akte të tilla si licensimi pa transparencë i bankës digjitale Jet Bank, për fat të keq nuk do të kalojë pa pasoja.

Bashkimi Europian kërkon procedurë rigoroze në këtë drejtim. Qeveria injoron qytetarët dhe detyrimet që ka këtu para publikut, por shpejt do ta marrë përgjigjen për këtë çështje.

Ne do ta ndjekim dhe jam i përkushtuar të zbuloj të vërtetën dhe kush fshihet pas këtij vendimi”, deklaron Këlliçi.

Më herët në fjalën e tij në parlament Këlliçi tha se banka digjitale që ka lincesuar qeveria, Jet Bank do të jetë një arsye pse negociatat do të shtyhen.

“Jemi në fazën që kemi hapur grup kapitujt, kemi hapur edhe ato të tregut të brendshëm. Mbajeni mend, kjo banka dixhitale që keni licensuar 'Jet Bank', do jetë një arsye që do shtyhen negociatat. Mbajeni mend këtu, këtu do jemi. Dhe nuk flisni kurrë.

Parafolësi që u shpreh për integrimin e Shqipërisë, në hapësirën imagjinare që ai ka të Bashkimit Europian, harron që dje foli komisionerja për zgjerim, Marta Kos, ku përmendi vetëm Malin e Zi, Islandën, përmendet Moldavia, por Shqipëria nuk ekziston më. Dhe ky është një problem, ky është një problem që na përket të gjithëve.

Por nuk mund të vazhdojmë këtu të gënjejmë opinionin publik, gënjejmë qytetarët, gënjejmë dhe njëri-tjetrin dhe të fshihemi pas artificave, jo ke dhe 10 sekonda, jo ke dhe 12 sekonda, jo 30 sekonda për diskutim.

Rrimë këtu ta gdhijmë po qe e nevojshme, të ezaurojmë të gjithë problemet që realisht prekin qytetarët”, deklaroi Këlliçi.

Deputeti demokrat ka denoncuar se pas Jet Bank fshihen njerëz që janë dënuar për mashtrim ndaj qytetarëve në vende të ndryshme të Europës./ CNA