Ngrihet flamuri i BE-së në kryeministri/ Rama: Do të doja të ishte edhe opozita

20 Korrik 2022, 08:52, Politikë CNA

Ngrihet flamuri i BE-së në kryeministri/ Rama: Do të doja të

Një ditë pas hapjes së negociatave, mëngjesin e sotëm është mbajtur ceremonia e ngritjes simbolike të flamurit të Europës në ambientet e Kryeministrisë.

Kryeministri Edi Rama është shprehur se ky moment shënon ngritjen në një nivel tjetër detyrimesh të marrëdhënieve të shoqërisë dhe qytetarit shqiptar me rregullat dhe vlerat europiane.

“Shumë të dashur qytetarë dhe qytetare, shqiptarë dhe shqiptare. Sot është një ditë e re për Shqipërinë dhe ju falënderoj ju që jeni këtu për ceremoninë e ngritjes, pas çeljes së negociatave. Prania juaj këtu është më shumë se një prani protokollare, pasi ju me institucionet që përfaqësoni jeni kontributorë për rrugëtimin europian të Shqipërisë.

Ngritja e këtij flamuri shënon ngritjen e Shqipërisë në një tjetër nivel.

Ky moment shënon ngritjen në një nivel tjetër detyrimesh të marrëdhënieve të shoqërisë dhe qytetarit shqiptar me rregullat dhe vlerat europiane”, ka thënë Rama.

Ai ka shprehur keqardhje për mungesën e opozitës në ceremoni, pasi tashmë, sipas tij, duhet edhe një nivel i ri marrëdhëniesh mes qeverisë dhe opozitës.

“Do të kisha dashur sot që këtu të ishte dhe opozita, jo sepse pasi ky nivel i ri marrëdhëniesh kërkon edhe një nivel të ri marrëdhëniesh mes qeverisë dhe opozitës. Por sot opozita ndodhet në një hendek të madh mes një pjesë të identifikuar me gjithçka bie ndesh me frymën dhe logjikën e Bashkimit Europian që nga minimi i demokracisë dhe korrupsioni dhe një pjesë tjetër, e cila nuk është damkosur, por edhe po i ftove nuk vijnë se kanë frika nga e para.

Unë e di se mes përfaqësuesve të vendeve mike dhe aleatë ka disa që i gëzohen kësaj arritjeje historike më shumë se disa syrre mes nesh që nxijnë si shpirti i tyre. Dua jo vetëm t’i falënderoj sot për gjithçka bënë që negociatat të hapen dhe Shqipëria të ngjitet në rrugën drejt majës ku populli shqiptar meriton, dua edhe t’u kërkoj ndjesë për gjithçka që i kanë dëgjuar veshët nga gojët e shthurura të Shqipërisë”, është shprehur Rama./CNA.al