Kryetarja e Gjykatës Kushtetuese, “shuplakë’ Kuvendit/ “Të zbatohet vendimi për mandatin e Xhaçkës”

29 Mars 2024, 21:15, Politikë CNA

Kryetarja e Gjykatës Kushtetuese, “shuplakë’ Kuvendit/

Ish-ministrja Olta Xhaçka

Kryetarja e Gjykatës Kushtetuese, Holta Zaçaj i ka dhënë shuplakë Kuvendit në lidhje me rastin e ish-ministres Olta Xhaçka, në një kohë kur opozita po kërkon që të zbatohet vendimi i institucionit që ajo drejton.

Zaçaj tha për Zërin e Amerikës se moszbatimi i vendimit për mandatin e ish-ministres është një situatë e pazakontë dhe e pamundur të ndodhë në një shtet demokratik.

Ndër të tjera, Zaçaj vuri theksin se çdo vendim i Gjykatës Kushtetuese duhet të zbatohet.

“Është një pyetje, në fakt, e përsëritur për Gjykatën dhe për mua personalisht në daljet e mia në media. Është vërtet një situatë e pazakontë dhe e pamundur që të ndodhë në një shtet demokratik. Unë e kam përmendur dhe herë të tjera – vendimet e Gjykatës Kushtetuese duhet të zbatohen dhe zbatimi i vendimeve të Gjykatës Kushtetuese përbën, në fakt, zbatim të vetë Kushtetutës. Kështu që fjalët janë të tepërta për të dhënë një mesazh më tepër përtej kësaj që unë sapo thashë. Çdo vendim duhet të zbatohet. Nuk ka një rrugë tjetër, nuk ka një mekanizëm tjetër dhe arsyeja pse nuk ka një mekanizëm tjetër është sepse është e pamundur të imagjinohet që të mos zbatohen vendimet e Gjykatës Kushtetuese, kështu që nuk mbetet shumë për të interpretuar në këtë moment”, tha Zaçaj.

Kujtojmë se Gjykata Kushtetuese në janar 2023 shfuqizoi si antikushtetues vendimin e Kuvendit për të bllokuar dërgimin për interpretim në këtë gjykatë të mandatit të Xhaçkës, pasi bashkëshorti i saj u shpall “investitor strategjik” dhe përfitoi veç të tjerash përmes një vendimi qeverie edhe shfrytëzimin e brigjeve të detit.

Ky vendim i Kushtetueses për mandatin e deputetes socialiste mbetet i pazbatuar. Çështja e mandatit të Xhaçkës mbahet në zyrën e Nikollës, e cila ka kompetencën ligjore që të vendosë për procedurën e mëtejshëm parlamentare që do të ndjekë zbatimi i vendimit të Gjykatës Kushtetuese.

Mandati i Xhaçkës është vënë në pikëpyetje për shkak të përfitimit të bashkëshortit të saj, Artan Gaçi të statusit të investitorit strategjik për një hotel në Dhërmi si dhe lejen për shfrytëzimin e brigjeve përpara hotelit.

Ndërkohë Prokuroria e Posaçme, SPAK, ka vendosur masën e sekuestros preventive mbi një sipërfaqe toke prej 5512 m2 në pronësi të Gaçit në bregdet, pasi dyshohet se u përfitua përmes dokumenteve të falsifikuara./ CNA