web counter
LEXO PA REKLAMA!

SHKARKO APP

App Store
Google Play

Berisha: Arratisja e Ahmetajt, si afera e shekullit

19 Korrik 2023, 14:13, Politikë CNA

Berisha: Arratisja e Ahmetajt, si afera e shekullit

Ish-kryeministri Sali Berisha në mbledhjen e grupit parlamentar ka deklaruar se arratisja e Arben Ahmetajt është e orekstruar nga kryeministri Edi Rama.

Sipas tij, Rama nuk përmendi arratisjen e Ahmetajt,  pasi e ka organizuar vetë.

Nga ana tjetër Berisha e ka quajtur Ramën kreun e organizatës së inceneratorëve.

“Sot ka polemikë në çdo familje, në çdo bisedë: vjedhja e tmerrshme me inceneratorë dhe arratisja e tmerrshme e Arben Ahmetajt.

Ju e dëgjuat në fjalën e tij 16-minutëshe, kreu i organizatës kriminale të inceneratorëve, nuk shqiptoi njëherë fjalën arratisje. Ajo për Edi Ramën nuk ka ndodhur, sepse e ka porositur vetë.

Shtetit i arratiset zyrtari i dytë më i lartë i ekzekutivit.

Për bosin e organizatës kriminale, kjo nuk ka ndodhur. Ndaj dhe me një paturpësi dhe cinizëm ekstrem, rrihte gjoksin, fliste për drejtësinë me ministrat në arrati dhe nuk fliste për arratinë dhe paturpësinë në një mungesë totale respekti ndaj qytetarëve.

Në një papërgjegjësi të plotë, në një apel të hapur për secilin nga zyrtarët e tij që të arratisen në rast se thirren nga drejtësia.

Gjushi meriton një dekoratë që nuk u arratis. Shikoni Gjushin dhe i çonin policinë, që t'i thonin të ikte. Por Gjushi nuk iku, pse, e di ai vetë. Kurse ky, i arratiset dhe nuk flet asnjë fjalë, çka do të thotë se ju të tjerët, njëri pas tjetrit.

A ka paturpësi, hipokrizi dhe cinizëm më të madh ndaj shqiptarëve?

Afera e inceneratorëve është afera e inceneratorëve, sikundër arratisja e Ahmetajt është arratisja e shekullit.

Sot propaganda e Edi Ramës është vërsulur e tëra për të fshehur me çdo kusht përgjegjësit e vërtetë, drejtuesit e vërtetë të organizatës kriminale. Sot bëhet gjithçka që afera qindra milionëshe e plehrave t'u atribuohet Mirel Mërtirit, Stela Gugalles dhe Klodian Zotos. Po bëhet që të mashtrohen qytetarët që të paraqitet si truri i djajve me zile që të mbulojnë para shqiptarëve të vërtetën. Vetëm për fshehur të vërtetën se bosët e aferës janë Rama, Ëngjëll Agaçi dhe Erion Veliaj”, është shprehur Berisha./ CNA





Lajmet e fundit nga