web counter
LEXO PA REKLAMA!

SHKARKO APP

App Store
Google Play

E fundit!

x

Doktor Zeqo Pilafi na tregon si zgjidhet çështja e aeroportit të Vlorës

30 Gusht 2025, 15:40, Plaku Mere CNA

Doktor Zeqo Pilafi na tregon si zgjidhet çështja e aeroportit

Nuk mund të qëndronte në heshtje doktor Zeqo Pilafi ynë. Kuptohet, fjalën e kemi për Mero Bazen, një mashtrues publik. Nuk ka ndonjë ndryshim të madh nga doktor Zeqo Pilafi, i shkruar aq bukur dhe vënë në skenë nga Arian Çuliqi.

Dje doktor Zequa ynë është rrekur të na tregojë se si zgjidhet çështja e aeroportit të Vlorës, cilat ishin problematikat, si kishin filluar ato etj., etj.

Së pari, gjente qasjen e medias që e kishte denoncuar, të “Kapitalit” të Klodian Tomorrit, e quante direkt media opozitare. E bënte me Saliun, siç ka qenë dhe vetë, aty mësoi ligësitë. Megjithëse Klodian Tomorri është një nga gazetarët më të mirë të ekonomisë dhe ka ndërtuar një media, një portal, me një qëndrim krejt tjetër, me profil të mirëfilltë ekonomik, në rast se ti i nxjerr aferat pushtetit dhe qeverisë, je opozitar. Nuk je media për Meron, je opozitar. Në fakt, detyra e medias është të jetë në opozitë, jo si Mero që lëpin fundshpinën e pagatorit të tij Veliaj.

Nejse, s’ka faj doktor Zeqo Pilafi ynë, siç e kemi thënë ne, në vetminë e tij dhe pleqërinë kaq të parakohshme dhe të dhimbshme gjëra të tilla do të thotë.

Le t’i hyjmë thelbit. Kishte bërë një shkrim të gjatë, ku na thoshte se qeveria duhet ta marrë në kontroll urgjent aeroportin e Vlorës dhe të ndërhyjë te kontratat që kanë bërë palët. Idiotësi më e madhe nuk është dëgjuar kurrë.

 

Doktor Zeqo Pilafi na tregon si zgjidhet çështja e aeroportit
Shkrimi i Mero Bazes

 

Në Vlorë ka një koncesion, njëra palë ka pretendime ndaj palës tjetër. Ata duhet ta zgjidhin me njëri-tjetrin. Në rast se ka kontrata, në mirëbesim, siç thotë doktor Zeqo Pilafi, ato nuk janë ligjore, nuk vlejnë asnjë lekë.

Kontratat ligjore çohen dhe regjistrohen në QKB. Në rast se qeveria kur ka firmosur kontratën, ka lënë hapësira që të ketë abuzime, patjetër që mund të ndodhin.

Por nuk mund të akuzohet as media që e publikoi, pasi gjithçka rezultoi e vërtetë, pra që ka një problematikë të madhe mes dy palëve aksionere.

Nga ana tjetër, nuk mund të fusë turinjtë Zeqo Pilafi për të marrë ndonjë llokmë në xhepat e tij, duke u bërë pjesë e njërës palë apo tjetrës për t’i dhënë zgjidhje nëpërmjet “shkopit magjik” të pushtetit.

Nuk e pamë ta kishte këtë qasje Zeqo Pilafi ynë, për çështjen e inceneratorëve për shembull, kur dolën disa kompani të huaja. Më pas ato u zhdukën dhe dy bashibozukë shqiptarë u vërsulën dhe morën 120 milionë euro vetëm për landfillin e Tiranës nga taksat e qytetarëve dhe pagesat e biznesit në kryeqytet. Nuk foli asnjë llaf.

Nuk foli për koncesionin e sterilizimit, ashtu sikundër nuk ka folur për “check up”-in, nga ku ka marrë pagesa.

Nuk flet për abuzimet në Bashkinë e Tiranës, nuk flet për skandalet dhe aferat e pushtetit, por gjen opozitarë e i çifton me Berishën, ata të cilët me të drejtë i ndezin sirenën e verdhë qeverisë, duke i dhënë alarmin se po gabohet, po vidhet, po abuzohet.

Në fakt, Zeqo Pilafi nuk mund të bëjë gjë tjetër, ai atë do. Sa më shumë pacientë, që t’i kurojë mjeshtërisht siç di vetëm ai. Dje na tregoi se çështjen e aeroportit të Vlorës dhe përplasjen mes dy aksionerëve duhet ta zgjidhë “shkopi magjik” i pushtetit.

“Tutkall me barut” e ka recetën doktor Zeqo Pilafi ynë, që t’i dalin flokët. Mjafton ta shikoni për ta kuptuar sa vlejnë recetat e doktor Zeqo Pilafit tonë./ CNA

 

 





Lajmet e fundit nga