E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Skandalet që nuk lejojnë zgjedhje!

26 Qershor 2025, 19:38, Opinione Grigels Muçollari

Zgjedhjet mbaruan, ndryshimi u ndalua me forcë dhe normalisht, vijon realiteti i hidhur. Skandalet thellohen, zvarritjet rriten, përgjegjësit fshihen. Ndërkohë që qytetarët u thirrën në votime, institucionet e drejtësisë vijojnë të luajnë me çështje jetike për shëndetin publik dhe sigurinë mjedisore të vendit.

Një ndër denoncimet e mia të hershme si përfaqësues i opozitës, që tashmë është bërë edhe objekt hetimi, lidhet me eksportin e paligjshëm të mbetjeve të rrezikshme nga Shqipëria drejt jashtë vendit. Një aferë e rëndë, ku përveç përfshirjes së kompanive private, po ekspozohet dhe dështimi i qëllimshëm i institucioneve për të vepruar me transparencë dhe përgjegjësi.

Prokuroria e Durrësit ka pranuar zyrtarisht se nuk ka arritur dakordësi me laboratorin e parë dhe se është në kërkim të një tjetër jashtë vendit. Por ndërkohë, laboratorë të certifikuar në Shqipëri i ofrojnë këto analiza brenda pak orësh me një kosto prej vetëm 306 euro për mostër. Çfarë e justifikon atëherë këtë zvarritje?

Aktivistët ndërkombëtarë si Jim Puckett nga organizata BAN e kanë quajtur këtë vonesë “të turpshme” dhe “me erë politike”. Ai vetë i ka sugjeruar Prokurorisë një laborator serioz europian për analizat, por më pas mësoi se po tentohej të bëhej gjithçka brenda vendit. Pse? Kush ka interes të kontrollojë rezultatet? Çfarë fshihet?

Sipas një investigimi të BIRN, Sasia e sekuestruar është vetëm maja e ajsbergut. Gjithçka nen bekimin qeveritar. S'ka asnjë shans të zhvendosen tonelata të tilla pa dijeninë e Ministrisë së Mjedisit apo drejtorit të Portit

Zvarritja e hetimeve nuk është më çështje teknike apo buxhetore. Është një strategji. Është një mënyrë për të mbuluar përgjegjësit dhe për të shtyrë pafundësisht çdo proces që mund të çojë te të vërtetat e hidhura të një sistemi të kalbur.

Dhe pikërisht për këtë arsye, kjo qeveri është e detyruar të deformojë vullnetin e qytetarëve në zgjedhje. Sepse një votim i lirë, i ndershëm, me institucione të pavarura, nuk do të lejonte as heshtjen, as zvarritjen, as mbulimin e skandaleve të kësaj natyre. Kjo është arsyeja pse opozita ka denoncuar me forcë farsën elektorale të 2025-s. Jo për karrige, por sepse në një shtet që funksionon, përgjegjësit do të kishin dhënë llogari dhe qytetarët do të kishin pasur të drejtën të zgjedhin me të vërtetë.

“Zgjedhjet” mbaruan, por problemet mbeten. Ne nuk duhet të ndalemi. Heshtja nuk është opsion kur përballë kemi krime mjedisore, neglizhencë shtetërore dhe një drejtësi që ngjan më shumë me një tifoz, sesa një arbitër./ CNA