E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

I plagosuri i vërtetë është shteti shqiptar

27 Prill 2024, 09:00, Opinione Mero Baze

Shtypi ka publikuar me pesë muaj vonesë një ngjarje, e cila ngre pikëpyetje të forta për integritetin e zyrtarëve të lartë të shtetit shqiptar. Burri i ministres Delina Ibrahimi është konfrontuar fizikisht me drejtorin e një agjencie në varësi të gruas së tij, pasi e ka thirrur t’i shkojë te biznesi i vet për t’u “sqaruar”.

Nuk po u hyj shumë detajeve të mjetit prerës, as të mbylljes së çështjes nga drejtësia, por ajo që mbetet hapur është integriteti i atyre që qeverisin.

Nuk do kisha reaguar po të mos lexoja arsyetimin e Delina Ibrahimit, e cila e trajton çështjen sikur ish- zyrtari i saj i paska shkuar te biznesi i burrit për sherr dhe lë të kuptojë që nuk e ka thirrur burri i vet.

Në fakt e ka thirrur burri i vet, dhe një burrë ministreje që thërret zyrtarët e saj në takime informale, janë një problem i madh për qeverinë dhe qeverisjen.

Së dyti, ajo që është dhe më e rëndë në deklarimin e saj, është fakti që ajo thotë se nuk e ka hequr nga drejtor, as ajo, as pasardhësi i saj për disa muaj.

Tani nëse ky drejtori i Agjencisë së Trajtimit të Kredive, ka shkuar vetë tek biznesi i burrit të ministres dhe janë përleshur fizikisht, atëherë minimalisht duhej shkarkuar nga detyra atë ditë dhe të çohej para drejtësisë.

Fakti që e kanë marrë me të mirë derisa kanë mbyllur çështjen dhe pastaj e kanë hedhur në rrugë, është dëshmi e plotë e faktit që burri i ministres është përgjegjës në atë konflikt dhe pavarësisht shkallës së lëndimit fizik, ai ka cenuar rëndë integritetin e administratës shqiptare.

Ato që zonja Ibrahimi i përmend si argumente pro saj, në fakt janë kundër saj. Në momentin që ka ndodhur konflikti ajo duhet t'ia kishte raportuar atë qeverisë dhe duhet të sillej si ministre, dhe jo si gruaja e njërit që bën sherr rrugëve. Ose shkarkonte zyrtarin në varësi, ose merrte përgjegjësinë për aktin e burrit të saj.

Kjo historia që nuk e paska hequr nga puna, është shumë e rëndë.

Akoma dhe më e rëndë fakti që burri i saj thërret ish- zyrtarët në takime për t’u “sqaruar” si i forti i lagjes. Shkëlzen Berisha ka pasur zyrë private në pushtet, ku thërriste njerëzit e shtetit dhe u jepte detyra. Tani është e tepërt të kemi burra ministresh që të japin dhe dru, ose poste.

Të tjerat nuk kanë ka rëndësi, nëse e ka qëlluar me thikë, nëse nuk e ka zënë thika, apo janë rrahur me grushte.

Nuk di sa është lënduar viktima e burrit të ministres apo vetë burri i ministres nga ai banalitet, por shteti është dukshëm i plagosur. /TemA