Vrasja e zyrtarit të EULEX/ Kryhen bastisje në 9 zona të Kosovës, shoqërohen 7 persona

19 Tetor 2025, 19:36, Kosova & Bota CNA

Vrasja e zyrtarit të EULEX/ Kryhen bastisje në 9 zona të

Prokuroria Speciale dhe Policia e Kosovës kanë njoftuar sot se kanë kryer bastisje në 2 zona në Zveçan dhe 7 zona në Zubin Potok, në kuadër të një hetimi lidhur me vrasjen e zyrtarit doganor lituanez i EULEX-it, Audrius Shenaviçius, më 19 shtator të vitit 2013.

Bazuar në njoftim, nga operacioni janë shoqëruar 7 persona nën dyshimin e kryerjes së disa verprave penale.

Mësohet se gjatë operacionit, janë sekuestruar dy armë, municion, veshje me përmbajtje nacionaliste, dylbi, dokumente, si edhe pajisje elektronike të ndryshme.

Njoftimi:

Në bazë të urdhrit të lëshuar nga Gjykata Themelore në Prishtinë dhe nën udhëhejqen e Prokurorisë Speciale në bashkëpunim me Policinë, është zhvilluar një operacion policor në Komunën e Zubin Potokut dhe të Zveçanit, në kuadër të një hetimi lidhur me vrasjen e zyrtarit të Misionit të Bashkimit Evropian për Sundim të Ligjit në Kosovë ( EULEX ) A.S., me qëllim të verifikimit të informatave dhe identifikimit të mundshëm të provave relevante.

Hetuesit policorë nga Drejtoria për Hetimin e Krimit të Organizuar dhe Krimeve të Rënda, kanë kryer bastisje në dy (2) lokacione në Zveçan dhe në shtatë (7) lokacione në Zubin Potok, nën dyshimin për kryerjen e veprave penale:

- Rrezikimin e personelit të Kombeve të Bashkuara ose personelit në marrëdhënie me to;

- Vrasje të Rëndë;

- Sulm ndaj personit zyrtarë gjatë kryerjes së detyrës zyrtare.

Gjatë operacionit, i cili është mbështetur edhe nga njësi të tjera relevante të Policisë së Kosovës, janë shoqëruar në Polici shtatë ( 7 ) persona, dhe pas intervistimit janë liruar në procedurë të rregullt.

Ndërsa, gjatë zbatimit të urdhërit për bastisje, si një hap i rëndësishëm procedural në kuadër të një hetimi që është ende në zhvillim, janë gjetur dhe sekuestruar prova materiale sikurse: dy armë, municion, veshje me përmbajtje nacionaliste, dylbi, dokumente, pajisje elektronike të ndryshme etj.

Prokuroria Speciale dhe Policia e Kosovës, ritheksojnë përkushtimin në luftën kundër krimit të organizuar dhe sjelljen para drejtësisë të atyre që cënojnë sigurinë, ligjin dhe rendin në Republikën e Kosovës./CNA