Trazira në Shkup/ Përshkallëzohet protesta kundër propozimit francez

5 Korrik 2022, 21:32, Kosova & Bota CNA

Trazira në Shkup/ Përshkallëzohet protesta kundër propozimit

Protesta në Maqedoni

Në ditën e katërt të protestave në Shkup kundër pranimit të propozimit francez, protestuesit kanë thyer xhamat e godinës së Ministrisë së Punëve të Jashtme.

Ndërsa, sipas raportimeve bëhet me dije se në drejtim të godinës qeveritare është hedhur koktej molotovi dhe sende të forta.

Protestuesit i kanë bërë thirrje ministrit të Jashtëm, Bujar Osmanit, që të mësojë historinë dhe në pankartat e tyre, emri i tij ishte deformuar në Bugar Osmani.

Ministri i Brendshëm, Oliver Spasovski, tha se 4 policë janë lënduar, teksa shtoi se në protestën e djeshme u tentua eskalimi i situatës.

“Dhuna ndaj atyre që kujdesen për rendin, policisë maqedonase , ndaj institucioneve nuk do të sjell asgjë. Dje kishim tentim për eskalim të situatës, kemi 4 policë të lënduar”, ka shkruar në profilin e tij në "Facebook", Spasovski.

Protestuesit kërkojnë që qeveria maqedonase të refuzojë propozimin e Bashkimit Europian, të njohur si propozim francez, për fillimin e negociatave për anëtarësim.

Sipas tyre, propozimi francez bën “bullgarizimin” e Maqedonisë së Veriut dhe nuk e njeh gjuhën dhe as historinë maqedonase.

Trazira në Shkup/ Përshkallëzohet protesta kundër propozimit

Kovaçevski: E patolerueshme të protestohet me maska

Kryeministri i Maqedonisë së Veriut, Dimitar Kovaçevski, gjatë ditës ka thënë se protestat e dhunshme nuk i kanë hije një vendi anëtar të NATO-s dhe një vendi që pretendon anëtarësimin në Bashkimin Europian.

“Po protestojnë njerëz që mbajnë maska, të cilët godasin policinë. Po, kemi polic të lënduar. Çdokush mund të protestojë për çdo çështje. Por qëllimi që të shkohet në protesta me maska është i patolerueshëm për një shtet që kaloi 27 prillin. Kjo nuk guxon të na ndodhë. Mbrëmë e patë se policia u tërhoq. Këtu bisedohet për propozim të ofruar nga Bashkimi Europian”, ka deklaruar kryeministri i Maqedonisë së Veriut, Dimitar Kovaçevski.

Trazira në Shkup/ Përshkallëzohet protesta kundër propozimit

Ndryshe, përmes propozimit francez i cili arriti në Maqedoninë e Veriut më 30 qershor synohet të tejkalohen dallimet mes Shkupit dhe Sofjes për çështjen e gjuhës dhe të kaluarës historike me këtë dhe zhbllokimin e procesit integrues.

Bullgaria tashmë dy vjet, përmes vetos, e ka bllokuar fillimin e bisedimeve për anëtarësim të Maqedonisë së Veriut, me këtë edhe heqjen e pengesës për Shqipërinë drejt rrugëtimit në procesin integrues në Bashkimin Europian./CNA.al