Finlanda, optimiste për liberalizimin e vizave për Kosovën në vjeshtë

4 Korrik 2022, 10:50, Kosova & Bota CNA

Finlanda, optimiste për liberalizimin e vizave për Kosovën

Një aplikacion për vizë në zonën Shengen.

Finlanda pret që Bashkimi Europian të përmbyllë çështjen e liberalizimit të vizave për Kosovën gjatë muajve në vijim, tha ministrja e Finlandës për Çështje Europiane dhe Drejtimin e Pronësisë, Tytti Tuppurainen.

Gjatë një konference për media në Prishtinë më 4 korrik, Tuppuraine tha se shteti i saj mbështet procesin euroatlantik të Kosovës dhe shteteve të rajonit të Ballkanit perëndimor.

“Ne mbështesim liberalizimin e vizave. Unë thashë që tani është koha dhe nevojiten të gjitha kriteret dhe pasi të përmbushen kriteret duhet të keni të drejtën që të merrni liberalizimin e vizave. Kosova është vendi i vetëm në Ballkanin Perëndimor që nuk ka liberalizim të vizave dhe është koha që të lëvizet përpara. Ne kemi mbështetur negociatat që flasin në favor të Kosovës në këtë drejtim. Kështu që unë mund të them se jam optimiste që ne do të vazhdojmë përpara në këtë çështje dhe besoj se në muajt në vijim, ndoshta këtë vjeshtë do të shohim rezultate pozitive”, tha ajo.

Tuppuraine së bashku me ministrin e Shtetit për Çështjet Europiane të Irlandës, Thomas Byrne, po qëndrojnë në Prishtinë, dhe folën për gazetarët pas takimit me zëvendëskryeministrin, Besnik Bislimi.

Kosova është shteti i vetëm në rajon, qytetarët e së cilës i nënshtrohen regjimit të vizave për udhëtim në zonën Shengen. Kosova ka përmbushur kriteret e BE-së për këtë proces dhe Parlamenti Europian dhe Komisioni Europian kanë rekomanduar një vendim pozitiv për këtë çështje, por një vendim për vizat ende nuk është marrë.

Ministrat e Finlandës dhe Irlandës, gjatë konferencës në Prishtinë mbështetën dialogun midis Kosovës dhe Serbisë që ndërmjetësohet nga Bashkimi Europian, duke thënë se presin që të arrihet përparim më i madh në këtë proces.

Sipas Byrne, dialogu është platforma më e mirë për të zgjidhur dallimet midis Prishtinës dhe Beogradit dhe për të avancuar perspektivën europiane të Kosovës.

"Ne e dimë në Irlandë që mund të jetë një rrugë e vështirë për pajtimin sepse kërkon durim dhe çdo marrëveshje e paqes ka kompromise për të gjitha anët. Kjo është edhe në marrëveshjen që kemi pasur me Irlandën Veriore”, tha ai.

Kosova dëshiron që një marrëveshje finale me Serbinë të përfshijë njohjen reciproke, ndërkaq Serbia kërkon një zgjidhje kompromisi.

Në anën tjetër, zëvendëskryeministri, Besnik Bislimi, tha se pas anëtarësimit të Finlandës dhe Suedisë në NATO, edhe Kosova duhet të bëhet pjesë e kësaj aleance ushtarake./Rel