LEXO PA REKLAMA!

SHKARKO APP

“El Nino”/ Temperatura ekstreme në Brazil, termometri shënoi mbi 44.8 gradë celsius

21 Nëntor 2023, 14:08, Kosova & Bota CNA
“El Nino”/ Temperatura ekstreme në Brazil, termometri
Foto ilustruese

Brazili ka regjistruar temperaturën më të lartë ndonjëherë duke shënuar 44.8 gradë celsius, ndërsa disa pjesë të vendit po përballen me një valë mbytëse të të nxehtit si pasojë e fenomenit “El Nino”.

"BBC" raporton se rekordi u shënua të dielën në qytetin Araçuai, në shtetin juglindor të Brazilit Minas Gerais, ndërsa parashikuesit kanë thënë se një pjesë e nxehtësisë ka të ngjarë të lehtësohet këtë javë.

Zyrtarët nga Instituti Kombëtar i Meteorologjisë thanë se vetëm tri kryeqytete shtetërore do të shihnin temperatura që i afrohen 40 gradë celsius.

Vapa ka shkaktuar alarme të kuqe në të gjithë vendin. Konsumi i energjisë në Brazil është rritur në nivele rekord pasi njerëzit përpiqen të qëndrojnë freskët.

Për shkak të motit, më herët Taylor Swift anuloi një nga koncertet e saj në Rio de Zhaneiro pasi një fanse u sëmur dhe vdiq para se ajo të niste një shfaqje të premten.

Hulumtimi zyrtar i publikuar dy javë më parë tregoi se temperatura mesatare në vend kishte qenë mbi mesataren historike nga korriku deri në tetor.

Moti ekstrem po bëhet më i shpeshtë dhe më intensiv në shumë vende të botës për shkak të ndryshimeve klimatike.

Sipas shkencëtarëve, valët e të nxehtit po bëhen më të gjata dhe më intensive në shumë vende dhe kjo pritet të vazhdojë ndërkohë që njerëzit vazhdojnë të lëshojnë gazra serë që ngrohin planetin. Ndërkohë, Toka është aktualisht në një fazë moti El Niño, gjatë së cilës temperaturat globale zakonisht rriten./CNA

 

Lajmet e fundit nga