“Rithemelimi të regjistrohet në koalicion”/ Spaho: Të përgatitemi për strategjinë pas 14 majit

2023-03-09 21:43:00, Politikë CNA

“Rithemelimi të regjistrohet në koalicion”/ Spaho: Të

Deputeti Edmond Spaho e ka cilësuar vendimin e sotëm të kryekomisonerit të Zgjedhjeve Ilirjan Celibashi, i cili njeh Lulzim Bashën kryetar të PD-së, si një tentativë për të mos lejuar "Rithemelimin" që të marrë pjesë në zgjedhjet e 14 majit.

Në studion e Debatit në A2 CNN, Spaho akuzoi ambasadoren amerikane në vendin tonë për presion dhe OSBE-ODIHR-in për heshtje.

“Mos u çudisni që nga fundi i javës të mblidhet dhe KAS dhe t’i japë të drejtë Alibravës që të regjistrohet dhe Celibashi do ta regjistrojë për zgjedhjet e 14 majit. Është tentativë për të mos lënë PD të konkurrojë në zgjedhje se është rrezik për pushtetin e Ramës dhe këto manovra janë koordinuar edhe me komunitetin ndërkombëtar që ose bëjnë presion me prezencë në Gjykatën e Apelit ose rrinë gojëmbyllur siç rri OSBE-ODIHR në këtë rast. Rithemelimi do të jetë naiv nëse ka iluzione që nga ky proces do të dalë një produkt në favor të tij. Asnjë vendim nuk do të jetë në favor të Rithemelimit të gjitha do jenë në kundërshtim me ligjin, por në favor të Alibravës”, tha Spaho.

Sipas Edmons Spahos, “Rithemelimi” duhet të regjistrohet sa më shpejt në koalicion me partitë e tjera parlamentare për zgjedhjet e 14 majit.

“PD rithemelimi duhet të mbyllë shpejt në mënyrë urgjente regjistrimin ën formën e një koalicioni me partitë e tjera parlamentare ose jo dhe të fokusohet në fushatën zgjedhore. Të vazhdojmë për t’u regjistruar në përputhje me ligjin në koalicion dhe të përqendrohemi në fushatë elektorale. Do të regjistrohen që Alibeaj të fusë disa kandidatë dhe të heqë edhe 200 vota dhe t’ia pamundësojë aksionin Rithemelimit deri në orën e fundit. Që të harxhosh energji në gjëra të tjera dhe jo në fushatë. Si të regjistrohem? Si të mbledh firma? Si të mobilizoj njerëzit për të mbyllur procesin e regjistrimit? .

Kjo periudhë 2-Vjeçare “Rithemelimit” duhet t’i shërbejë për të përshtatur strategjitë e saj pas 14 majit. Harrojeni që kjo histori do mbyllet në favor të Rithemelimit. Ne duhet të mendojmë seriozisht që tani si të konkurrojmë në zgjedhjet 2025 dhe si do të organizojmë aktivitetin tonë parlamentar dhe të mos konsiderohemi si deputetë të pavarur, por të na krijohen kushtet të veprojmë si një trupë e mirëorganizuar. Janë debate serioze që duhen bërë në PD dhe të marrin vendimet më të mira në interesin tonë dhe të elektoratit që na mbështet”, tha ai.