Elvi Fundo zbulon prapaskenat/ Si mediat gënjyen shqiptarët pasi morën para nga inceneratorët

2023-03-21 22:02:00, Denoncim CNA

Elvi Fundo zbulon prapaskenat/ Si mediat gënjyen shqiptarët pasi

Rreth një vit më parë, gazetari Elvi Fundo publikoi në emisionin “A Show” të Adi Krastës me dokumenta mediat që merrnin para nga kompanitë e inceneratorëve, për të heshtur mbi aferën dhe për të bërë propagandë për ta.

Në raportin e djeshëm, Departamenti Amerikan i Shtetit konfirmonte se mediat janë korruptuar nga inceneratorët.

Për këtë çështje ka folur sërish në emisionin “A Show” gazetari Fundo, i cili denoncoi sërish se si mediat kanë gënjyer shqiptarët për shkak të parave që kanë marrë.

“Formulimi i atij lajmi në momentin e parë u mohua dhe pati dhe nga ata të “çmendur” që thanë se ne kemi marrë lekë, kemi bërë reklama. Por si mund të reklamosh me lekët e taksave të shqiptarëve ndërkohë që atje kishte një komision hetimor, ndërkohë që opozita denonconte, ndërkohë që mediat denonconin, ti duhet të çosh gazetarë dhe kameramanë e ta investigosh a po vidhen taksat e shqiptarëve se kjo është puna e mediave.

Nuk mund të shkosh në inceneratorin e Elbasanit që nuk punon dhe siç kam thënë është një kazan me naftë i Stela Gugalljas, i cili do dy milionë dollarë në vit që të punojë. Nuk ka punuar kurrë, lëre çfarë thonë, është në remont. Është një gënjeshtër dhe këta merrnin para, nuk shkonin atje për ta parë punonte apo nuk punonte apo siç ndodhi gënjeshtra me inceneratorin e Fierit, ku shkuan grupi me komisionin hetimor dhe thonin po punon.

Kishin ndezur një rrul atje, një transportier dhe thonin po punon, ndërkohë që lekët në media kërcisnin, nga "Top Channel" i pari, te Carlo Bollino i dyti. Carlo ishte personi që reagoi publikisht dhe tha ne kemi marrë pagesa dhe kemi bërë reklama. Është njësoj si të marrësh para nga mafia, mora para nga mafia dhe bëra reklamë për plehrat sepse duhet të bënin kompanitë monopoliste reklama, atë e di vetëm Carloja apo ata që nuk e justifikuan. Ka pasur dhe nga ata të tjerë kolegë që kanë marrë një shuk lekësh atje dhe tani bëjnë të ndershmit e ekranit që ajo ishte çështje zgjedhjesh, edhe mund t’i merrje paratë, edhe mund të mos i merrje paratë. Ajo nuk është çështje zgjedhjesh, është çështje anësish, o do jesh në anën e qytetarëve, o do jesh kundër tyre.

Nuk po them që ishte vetëm Carlo Bollino, para ka marrë Irfan Hysenbelliu, ka marrë "Fax News", profesor doktor Baton Haxhiu e të tjerë me radhë, është lista shumë e gjatë. Ajo që është shumë e dhimbshme është se pagesat kanë vazhduar”, theksoi ai ndër të tjera./ CNA