Murrizi zbërthen takimin Rama-Kim/ Kush “ia tërhoqi veshin” kryeministrit dhe ambasadores

2022-12-13 16:43:00, Aktualitet CNA

Murrizi zbërthen takimin Rama-Kim/ Kush “ia tërhoqi

Ish-deputeti i Partisë Demokratike, Myslim Murrizi

Ish-deputeti i Partisë Demokratike, Myslim Murrizi, ka reaguar për takimin e kryeminstrit Edi Rama me ambasadoren Yuri Kim, disa ditë pasi ministria e Jashtme njoftoi se kanë nisur procedurat për zëvendësimin e diplomates amerikane.

Me anë të një statusi në rrjetet sociale, Murrizi thotë se takimi Rama-Kim nuk ishte me dëshirë, por pretendon se atyre “ia ka tërhequr veshin” George Soros.

Ai deklaron se të premten do të shohim se kush ka dalë me “fitore” nga takimi i djeshëm, pasi do të zgjidhet kreu i ri i SPAK.

Statusi i plotë:

Takimi i djeshëm i Znj. Kim me KM Rama pas “shkarkimit” që Rama i bëri para pak ditësh Zj. Kim nëpërmjet Oltës më kujtoi filmin "Lulkuqa mbi mure" kur pajtohet Jaçja me shokun e tij.

Sipas meje, ky takim “pajtimi” para datës 16 dhjetor kur KLP do të zgjedhë kreun e SPAK-ut nuk besoj se është çështje dëshire e “dy” të zemëruarve, por besoj që është “tërheqje" veshi nga padrino Sorosi që inicioi këtë mender “reformë” në drejtësi që falë 140 deputetëve spurdhjakë “votuan” në vitin 2016.

Vendimi i sotëm i Gjykatës së Strasburgut që konstatoi se Prokurorja Antoneta Sevdari është shkarkuar nga një tufë fundërrinash te KPK dhe KPA në kundërshtim me procedurat normale ligjore, tregon më së miri se nga kush është bërë vetingu dhe çfarë standardi është ruajtur.

Fakti që 5-6 anëtarë të trupës vetinguese janë shkarkuar, janë dënuar apo janë nën hetim tregon më se miri se çfarë llumhaneje është përzgjedhur për veting në mënyrë të qëllimshme nga politika.

Fakt tjetër është se kanë kaluar vetingun të gjithë ish-hetues, gjyqtarë, prokurorë dhe sigurimsa të regjimit bastard të atij që rrotullohet në varr " i kënaqur” kur sheh në majën e drejtësisë së “re” këlyshët e tij.

Që Zj.Kim dhe KM Rama të mos “zihen” më pas datës 16 dhjetor nuk e besoj kurrë, sepse njëri nga të dy do ta humbë “bastin” patjetër sepse KLP nuk mund të zgjedhë dot dy drejtues SPAK-u, por vetëm një.

Të premten do të shohim se kush ka dalë me “fitore” nga takimi i djeshëm mes dy vartësve të Xhorxhit.

Po u zgjodh ai që preferon Zj.Kim do të thotë që KM e kanë urdhëruar të zbythet.

Po u zgjodh ai që preferon KM do të thotë që Zj. Kim e kanë urdhëruar të tërhiqet.

Në pamjen e parë duket si “bast” i vogël, por është aq i madh sa më kujton përsëritjen e zgjedhjeve të vitit 1996 kur ju kërkua nga ish-Presidenti Bush i shoqëruar nga Z.Pauell në Vlorë dhe pastaj erdhi marsi i vitit 1997.

E di që të gjithë ata që shijojnë “frutet” e pushtetit po t'i pyeste njeri do të thoshin si kjo Zj. nga Berati që nuk duam as bukë as ujë as drita vetëm. Ju mos u zini.

Ehhhh në çfarë sikleti janë futur si pa “dashje” sepse litari po shtrëngohet gjithandej sa kohë që BE arreston zv.Presidenten dhe 4 euro Deputet për 600 mijë euro, këtu i bie që të “pushkatohen” 4-5 politikanë që kanë vjedhur mbi 5-6 miliardë euro bashkë me lakenjtë e tyre nga pas.

Jam i bindur se të premten pas zgjedhjes se kreut të ri te SPAK-ut fillon një histori e re dhe do habiten shumë edhe vetë tufa e qeverisë që mendon se janë në qiellin e shtatë dhe te paprekshëm

Zullumi këputet kur trashet, fija keputet kur hollohet.

PS: Kush ka kohë të mos mërzitet 3 min e të shohë këtë vd dhe do të kuptojë që ka kohë që është prishur “harmonia” e miqësisë mes Zj. Kim dhe Kim Jongut të qeverisë shqiptare.