Muaji i Ramazanit/ Myftiu i Korçës uron besimtarët: Agjërim të lehtë e të pranuar!

2024-03-10 10:35:00, Aktualitet CNA

Muaji i Ramazanit/ Myftiu i Korçës uron besimtarët:

Ledian Çikalleshi

Për muajin e shenjtë të Ramazanit myftiu i Korçës, Ledian Çikalleshi ka uruar të gjithë besimtarët myslimanë. Ai lut Allahun që të pranojë agjërimin e të gjithë besimtarëve dhe shprehet se ky muaj na sjell mirësi, paqe në familjet tona, dhe në mbarë shoqërinë.

"Agjërim të lehtë e të pranuar", shprehet Myftiu.

Fjala e plotë:

Të nderuar besimtarë. Nesër, në 11 Mars 2024, fillon muaji i bekuar i Ramazanit. Kam kënaqësinë dhe nderin të uroj në emrin tim personal, dhe në emrin e institucionit që përfaqësoj, të gjithë besimtarët myslimanë të qarkut të Korçës Gëzuar muajin e begatë të Ramazanit. Thotë i lartësuari në librin e tij fisnik: Agjërimi është bërë obligim për ju, sikur ka qenë obligim edhe për ata që ishin para jush, që të jeni më të devotshëm, më të përkushtuar. Ndërsa i dërguari i Allahut ka thënë: Ju ka ardhur Ramazani, muaji i bekuar, Allahu ua ka bërë obligim agjërimin e këtij muaji. Në këtë muaj hapen dyert e xhehnetit, dhe mbyllen dyert e xhehnemit, kurse shejtanët mblidhen me zinxhir. Allahu në këtë muaj ka zgjedhur një natë që është më e mirë se një mijë muaj. Ai që privohet nga të mirat e kësaj nate, është privuar nga çdo e mirë.

Të nderuar motra e vëllezër, trokitja në derë e këtij mysafiri të nderuar është një sihariq i mirë për të gjithë besimtarët, të cilët i kaplon një gëzim i madh. Gëzimi nuk është vetëm i të rriturve, por i të gjithë moshave, për të cilët ka prej tyre që nuk e kanë obligim agjërimin e Ramazanit. Ramazani është muaji i mëshirës, muaji ku zemrat e thara nga malli për të, sërish fitojne gjallërinë. Muaji i Ramazanit është muaji i durimit, i lutjes, i kuranit, i bujarisë, i dashurisë, vlerave njerëzore, respektit dhe dorëzimit ndaj krijuesit. Gjatë këtij muaji të rizgjojmë ndjenjat e bukura, të ndezim shpresën, të pastrojmë ndërgjegjet dhe të lutemi. E nisim këtë muaj edhe për sihariqin më të mirë, më të bukur, që menjëherë pas vështirësisë vjen lehtësimi.

Të nderuar motra dhe vëllezër, Ramazani është festë hyjnore, e përvitshme, drejt njohjes dhe përgjegjësive tona në raport me zotin, me veten, familjen, të afërmit dhe shoqërinë. Ne kemi nevojë të pendohemi dhe kur jemi agjërueshëm, është momenti i duhur ti kërkojmë zotit falje.

Të nderuar motra e vëllezër dhe besimtarët kudo që gjendeni, lus allahun të na i pranoje agjërimin, adhurimet dhe veprat e mira. Ky muaj na sjell begati, mirësi, paqe në familjet tona, dhe në mbarë shoqërinë.

Agjërim të lehtë e të pranuar!/CNA