Prostitucioni “mbërthen” Tiranën/ Kamuflohen si qendra masazhezh, rekrutojnë vajza dhe ofrojnë seks me pagesë

2022-08-05 09:32:00, Aktualitet CNA

Prostitucioni “mbërthen” Tiranën/ Kamuflohen si qendra

Foto ilustruese

Qendrat e masazheve në Tiranë, po përdoren masivisht për ushtrim prostitucioni. Policia njofton se pas hetimeve disa mujore ka arritur të bjerë në gjurmët e një qendre të tillë.

Tre persona janë vënë në pranga dhe katër të tjerë po hetohen në gjendje të lirë, ndërkohë që është shpallur në kërkim pronari qendrës së prostitucionit.

Mosha e të arrestuarve është përkatësisht e re nga 22 deri në 30 vjeç, vetëm klienti që në këtë rast ka qenë një shtetas nga Maqedonia është 37 vjeç.

Njoftimi i Policisë:

Specialistët e Seksionit për Hetimin e Krimeve në Komisariatin e Policisë Nr. 6, në vijim të punës për goditjen e paligjshmërisë, pas një pune të mirëfilltë hetimore disamujore, bazuar dhe në informacionet e marra në rrugë operative, për veprimtarinë e kundërligjshme të prostitucionit në një qendër masazhesh, organizuan dhe finalizuan me sukses operacionin policor të koduar "Location".

Si rezultat i këtij operacioni u bë arrestimi në flagrancë i shtetaseve:

- M. H., 27 vjeç dhe B. K., 23 vjeçe, të dyja banuese në Tiranë, menaxhere në një qendër masazhesh, për veprat penale "Shfrytëzimi i prostitucionit" dhe "Moskallëzimi i krimit";

- S. S., 22 vjeçe, banuese në Tiranë, punonjëse në qendrën e masazheve, për veprën penale "Prostitucioni".

Gjithashtu, u proceduan penalisht në gjendje të lirë, për veprën penale "Prostitucioni", shtetasit:

Z. A., 30 vjeçe, Xh. Sh., 21 vjeçe dhe A. K., 26 vjeçe, të trija banuese në Tiranë, punonjëse në qendrën e masazheve;

R. M., 37 vjeç, banues në Maqedoni, klient në qendrën e masazheve.

Gjithashtu, në vijim të veprimeve, u shpall në kërkim shtetasi M. M., 47 vjeç, pronari i qendrës së masazheve, për veprat penale "Mbajtja e lokaleve për prostitucion" dhe "Shfrytëzimi i prostitucionit".

Shtetaset M. H. dhe B. K. menaxhonin qendrën e masazheve në pronësi të shtetasit M. M., në rrugën "Teodor Keko", në të cilën ishin të punësuara shtetaset S. S., Z. A., Xh. Sh. dhe A. K.

Përvec aktivitetit të regjistruar si qendër masazhesh, në këtë ambient, nga 2 menaxheret dhe 4 punonjëset (masazhatore), ushtrohej edhe aktiviteti i kundërligjshëm i prostitucionit, i organizuar nga pronari i kësaj qendre./CNA.al