Faktet e reja/ Pronarët e inceneratorëve sigurojnë 41 milionë euro nga biznesi i dherave, zbërthehet marrëveshja

2023-11-01 14:02:00, Aktualitet CNA

Faktet e reja/ Pronarët e inceneratorëve sigurojnë 41

Ish deputeti dhe anëtari i kryesisë së PD-së, Belind Këlliçi ka vijuar më tej me denoncimet për aferën e inceneratorëve.

Këlliçi në një deklaratë për mediat ka treguar detaje nga marrëveshja e nënshkruar në datën 18 tetor 2018 nga katër palë: Inceneratorit fantazmë, Policisë Bashkiake, Drejtorisë së Përgjithshme të Punëve Publike të Bashkisë Tiranë dhe Inspektoratit shtetëror të mjedisit.

Sipas fakteve të prezantuara nga Këlliçi, përmes kësaj marrëveshjeje, pronarët e inceneratorit të Tiranës, sigurojnë 41 milionë euro nga biznesi monopol i dherave, i cili nuk përfshihet si e ardhur në kontratën koncensionare, të dakortësuar dhe firmosur në mars të vitit 2018 nga vetë Erion Veliaj.

“Sot po publikojmë të tjera fakte dhe prova se si i gjithë aparati i Bashkisë së drejtuar nga Erion Veliaj, është vënë në shërbim të inceneratorit fantazmë të Tiranës, këtë herë përmes biznesit të dherave.

Një vit pas nënshkrimit të kontratës korruptive për inceneratorin e Tiranës, në datën 18 tetor 2018, është nënshkruar një marrëveshje bashkëpunimi mes katër palëve: Inceneratorit fantazmë, Policisë Bashkiake, Drejtorisë së Përgjithshme të Punëve Publike të Bashkisë Tiranë dhe Inspektoratit shtetëror të mjedisit.

Kjo marrëveshje, siç do ta zbërthejmë më poshtë, ka si synim vënien nën kontroll të ndërtuesve, favorizimin e miqve të kryetarit të Bashkisë, si dhe vënien e administratës së Bashkisë Tiranë në dispozicion të biznesit korruptiv të dherave.

Vetëm përmes kësaj marrëveshjeje, pronarët e inceneratorit fantazmë të Tiranës, sigurojnë 41 milionë euro nga biznesi monopol i dherave, i cili nuk përfshihet si e ardhur në kontratën koncensionare, të dakortësuar dhe firmosur në mars të vitit 2018 nga vetë Erion Veliaj.

Dua t’i ritheksoj edhe një herë palët në marrëveshje:

1.   Inceneratori fantazëm i Tiranës;

2.   Policia Bashkiake e Tiranës;

3.   Drejtori i Bashkisë Tiranë, Taulant Tusha;

4.   Inspektorati i Mjedisit Tiranë.

E para, si ka mundësi që Taulant Tusha figuron si institucion më vete, me të drejtën për të lidhur marrëveshje në emër të Bashkisë, në shërbim të inceneratorit fantazëm? A mund ta kuptojë njeri, se si një drejtori në organigramën e Bashkisë Tiranë, mundet të lidhë marrëveshje si entitet më vete?”, tha Këlliçi./ CNA