Porti i Durrësit në Porto Romano/ “Shpronësimi me vlerën e tokës arë, abuzues”

22 Gusht 2023, 16:51, Denoncim CNA

Porti i Durrësit në Porto Romano/ “Shpronësimi me

Foto ilustruese

Agjencia Shtetërore për Shpronësim, në muajin Korrik publikoi një listë me emrat e pronarëve që do të kompensohen për tokat e tyre në të cilat do të ndërtohet porti në Porto Romano.

Pas publikimit të kësaj liste, një qytetar nga Durrësi, ka shprehur pranë redaksisë së CNA shqetësimin e tij në lidhje me shpronësimin dhe çmimin e përcaktuar nga qeveria.

Ai thotë se çmimi prej 540 lekë për metër katror i përcaktuar nga qeveria është shqetësues dhe qesharak.

Më tej ai nënvizon faktin se ky çmim është shumë larg çmimit të tregut dhe se për këtë nuk është marrë as mendimi dhe as pëlqimi i tyre.

Qytetari e ka quajtur këtë një grabitje shtetërore me ligj.

“Jam një banor nga Durrësi! Para disa ditësh është publikuar një listë që do të kompensohen për tokat e tyre në të cilën do ndërtohet porti në Porto Romano.

Në këtë listë jam dhe unë.Ajo që na shqetëson pa masë është çmimi qesharak dhe i papranueshëm që është përcaktuar nga qeveria në vlerën 540 lekë për m².Një çmim shum larg çmimit të tregut.Për më tepër nuk është marrë mendimi dhe pëlqimi jonë.Kjo është një grabitje shtetërore me ligj”, bëri me dije për CNA qytetari.

Më tej ai tha se ky është një abuzim dhe se emri i tij në listën e pronarëve që do të preken nga shpronësimet ishte surprizues, pasi më herët askush nuk është konsultuar me atë apo edhe pronarët e tjerë të tokave përreth.

Ndërkohë që me 28 korrrik u bë publike edhe lista e 309 personave që do të preken nga projekti i zhvendosjes së Portit të ri të Durrësit në Porto Romano.

Agjencia Shtetërore për Shpronësim ka bërë publike listën dhe ku vlera korresponduese në lekë është 821 milionë apo rreth 8 milionë euro.

Në publikimin e listës dhe të detajeve ASSH nënvizon se kërkesa është bërë nga Autoriteti Portual Durrës.

Me anë të këtij publikimi kërkohet vënia në dijeni të personave të prekur nga ky shpronësim për interes publik, për pasuritë e paluajtshme, pronë private, të cilat do të kompensohen sipas vlerësimit paraprak të llogaritur, për pasuritë e llojit “arë” bazuar në VKM-në nr. 89, datë 3.2.2016, “Për miratimin e hartës së vlerës së tokës në Republikën e Shqipërisë”./ CNA