web counter
LEXO PA REKLAMA!

SHKARKO APP

App Store
Google Play

E fundit!

x

Historia e koktejit Molotov, një nga armët më të famshme në histori

11 Shtator 2022, 12:55, Blog Calin Aneculaesei
Historia e koktejit Molotov, një nga armët më të famshme
Foto ilustruese

Kokteji Molotov ka qenë një element kryesor i shumë aspekteve të shoqërisë dhe medias. Duke kaluar nga përdorimi i saj gjatë kryengritjeve, revolucioneve dhe luftërave, deri tek paraqitja e tij në ekranin e madh të kinemasë, bomba karakteristike e bazuar tek djegia e karburantit, është tashmë shumë e famshme.

Përkundër popullaritetit që ka, shumica e njerëzve që e kanë parë Koktejin Molotov qoftë në jetën reale apo në filma, nuk dinë asgjë për origjinën e tij, dhe më e rëndësishmja, se si e mori këtë emër. Përdorimi i parë i dokumentuar i Koktejit Molotov, duket se ka qenë gjatë Luftës Civile Spanjolle.

Nevoja për një armë të tillë, lindi për shkak të zhvillimeve të reja të taktikave në luftën urbane. Me mbështetjen e Rusisë sovjetike, republikanët spanjollë ishin në gjendje të blinin tanket sovjetike T-26, të cilat dukej se ishin shumë të aftë në luftimet urbane.

Në kushtet kur armët konvencionale nuk funksiononin kundër tankeve të teknologjisë më të fundit, gjenerali i forcave nacionaliste, Françisko Franko, urdhëroi përdorimin e pajisjeve ndezëse të prodhuara në mënyrë artizanale për të djegur ingramazhet e rrotave, duke i bërë të palëvizshëm tanket.

Mjeti ndezës që ai urdhëroi të përdorej, do të rezultonte shumë efektiv kundër tankeve sovjetike të përdorur nga republikanët. Pas përdorimit të tij të parë në vitin 1936 nga nacionalistët spanjollë, ai do të niste të përdorej edhe nga republikanët duke çuar në përdorimin e tij gjatë gjithë luftës, deri në fitoren përfundimtare të nacionalistëve.

Por Kokteji Molotov nuk do të përdorej vetëm në atë luftë. Vetëm 3 vjet më vonë, lajmi për efektivitetin e tij do të përhapej në Finlandë, e cila sapo ishte përfshirë në një luftë ndaj Ushtrisë së Kuqe sovjetike. Lufta e Dimrit, është emri që mori pushtimi i Finlandës nga Bashkimi Sovjetik.

Ushtria finlandeze, shumë më e pakët në numër sesa armiku, u detyrua të përdorte taktika luftarake të stilit gueril, për të pasur ndonjë shpresë në përballjen me ushtrinë e frikshme sovjetike. Gjatë atij konflikti, u përdor çdo lloj mjeti që siguronte njëfarë avantazhi.

Kjo përfshinte edhe përdorimin e terrenit, për t’i kthyer shanset në favor të finlandezëve.

Për t’iu kundërvënë taktikave të tilla, sovjetikët do t’i bombardonin me bomba ndezëze thërruese vendet ku do të përparonin trupat e tyre.

Ministri i Jashtëm sovjetik Vjaçesllav Molotov do të shkonte vazhdimisht në radio dhe do t’u shpjegonte dëgjuesve, se sovjetikët po hidhnin nga ajri vetëm “ndihma humanitare” dhe asgjë nga ato që pretendonin finlandezët. Për pasojë, ushtarët e ushtrisë finlandeze i vunë nofkën “shportat e piknikut të Molotovit” bombave djegëse thërrmuese, dhe premtuan se do t’ia kthenin “nderin” me “Kokteje Molotovi”.

Dhe ata e mbajtën premtimin e tyre, siç u pa nga divizionet e blinduara sovjetike, të cilat u përballën me qindra mijëra Kokteje Molotov. Deri në fund të luftës, gati gjysmë milionë kokteje të tilla do të hidheshin ndaj armikut nga ushtria finlandeze.

Edhe pse luftoi me shumë guxim, ajo nuk ishte në gjendje ta mposhtte makinerinë sovjetike të luftës. Ndaj e humbi luftën në marsin e vitit 1940, por pësoi humbje territoriale minimale.

Edhe pse mund të argumentohet se nga pikëpamja e viktimave, finlandezët i mundën sovjetikët, për shkak të raportit 1 me 5 të të vrarëve mes dy palëve, ata zyrtarisht e humbën konfliktin. Por pseudonimi i tyre ndaj shisheve të mbushura me benzinë, mbetet i rëndësishëm edhe sot e kësaj dite.

Kokteji Molotov do të evoluonte duke u bërë “miku” më i mirë i revolucionarit. Me kalimin e viteve, shumë protesta dhe revolucione kanë përfshirë përdorimin e zjarrit si armë, dhe Kokteji Molotov është dëshmuar si mënyra më ekonomike dhe më e lehtë për t’i vendosur zjarrin objektivit të dëshiruar, me një rrezik minimal për hedhësin.

Kjo pajisje është vërtet personifikim i një skenari të tipit “Davidi kundër Goliatit”. Davidi përfaqësohet nga finlandezët apo cilado forcë që e përdor këtë lloj arme, kundër një figure të tipit Goliat që përfaqëson Ushtrinë e Kuqe apo agresorë të tjerë të plotfuqishëm.

Nga kjo histori mund të mësohet shumë. Lufta kundër një force dominuese mund të duket gjithmonë si tejet e pamundur dhe e kotë. Por historia na mëson se kjo nuk është e vërtetë, dhe se nëse veprohet me zgjuarsi, shanset në një luftë mund të kthehen gjithnjë në favorin tuaj, nëse i luani siç duhet ”letrat” tuaja./ Përshtatur nga CNA.al





Lajmet e fundit nga