LEXO PA REKLAMA!

SHKARKO APP

Zvarritjet e Ilir Beqajt për t'i shpëtuar SPAK/ Tentativat e Edvin Kondilit për të mbuluar aferën

18 Nëntor 2023, 14:29, Aktualitet CNA
Zvarritjet e Ilir Beqajt për t'i shpëtuar SPAK/ Tentativat e
Ervin Kondili dhe Ilir Beqaj

"Peshqit e mëdhenj" mesa duket po goditen një nga një. Ish-ministri i Shëndetësisë, Ilir Beqaj nuk i ka shpëtuar "sitës" së SPAK. 

Të shtunën, Gjykata e Posaçme vendosi masën e sigurisë "detyrim me paraqitje dhe ndalim i daljes jashtë shtetit" për ish-ministrin për veprën penale shpërdorim detyre, pas hetimeve për koncesionin e sterilizimit, një aferë 100 milionë euro e denoncuar fort nga mediat dhe opozita.

Po kështu, GJKKO urdhëron që ish-ministri të paraqitet para policisë gjyqësore të Byrosë Kombëtare të Hetimit, një herë në javë, ditë të premte, ora 15.30.

Pasi CNA, raportoi skandalin se Shqipëria ka mbetur pa kryenegociator me BE-në, erdhi edhe njoftimi nga Ilir Beqaj se ka dhënë dorëheqjen nga detyra e drejtorit për Agjencisë Shtetërore të Programimit Strategjik dhe Koordinimit të Ndihmës.

Në lidhje me akuzat për koncesionin e sterlizimit, Beqaj ka dëshmuar para prokurorëve të SPAK se “ka zbatuar të gjitha detyrimet për aq sa i lejon ligji për dhënien e koncesionit”.

Zvarritjet e Ilir Beqajt për t'i shpëtuar hetimeve të SPAK

CNA ka denoncuar më herët se hetimi i kryesuar nga Edvin Kondili, prokurori i Rilindjes së SPAK, nuk është kryer i plotë. Kondili ka tentuar ta mbyllë dosjen dhe ta shfajësojë Beqajn edhe pse ka gjetur udhëtime të këtij të fundit me biznesmenë për lidhje me koncesionin. 

Përveç zvarritjes së hetimeve dhe tendencës për mospërfshirjen e Beqajt, prokurori i çështjes, Edvin Kondili ka deklaruar për mediat se lidhi vonesën e ekzekutimit të masave të sigurisë për 8 personat e tjerë të përfshirë në këtë aferë, me me faktin që biznesmeni nën akuzë, Ilir Rrapaj nuk ndodhej në Shqipëri.

“Ka qenë një taktikë e jona, sepse e dinim që do të vinte edhe personi tjetër nën hetim,” tha ai, duke nënkuptuar se arrestimi i ish-zv.ministrit Rrjepaj mund të sillte si pasojë largimin e biznesmenit Ilir Rrapaj.

Por, historia mori një tjetër rrjedhë, me vendosmërinë e gjyqtarit Erion Bani, i cili orientoi prokurorinë që të hetonte ndaj ish-ministrit apo personave të përfshirë në këtë dosje. 

“Unë pashë që kishte vepra të tjera penale dhe persona, përfshi edhe dy ish-ministrat dhe e kam orientuar prokurorinë që të hetojë në këtë drejtim", është shprehur pak kohë më parë gjyqtari Erion Bani, i cili shqyrtoi masat e sigurisë.

Vendimi i GJKKO-së: 

Në muajin gusht, CNA siguroi vendimin e Gjykatës së Posaçme të Shkallës së Parë për dosjen e koncesionit të sterilizimit, një nga çështjet e “nxehta" në duart e SPAK-ut që ka sjellë edhe reagime të shumta politike.

Pas kallëzimit të bërë nga “Nisma Thurje” në dhjetor të vitit 2019, Prokuroria e Posaçme ka ngritur akuza ndaj 8 personave, si të përfshirë për veprat penale “falsifikim i dokumenteve”, “mashtrim” dhe “shpërdorim detyre”.

Pas hetimeve gjykata ka dhënë masat “arrest me burg” për ish-zv.ministrin e Shëndetësisë, Klodian Rjepaj dhe biznesmenin Ilir Rrapaj.

Ish-zv-ministri i Shëndetësisë, Klodian Rjepaj akuzohet për “mashtrim”, “falsifikim i dokumenteve” dhe “shpërdorim detyre”. Ndërsa mbi biznesmenin Ilir Rrapaj rëndon akuza e mashtrimit.

Sakaq, gjykata ka dhënë masën e sigurisë “arrest shtëpie” për Saimir Kadiun dhe masën “detyrim paraqitje” për 4 të tjerë, Arben Gjatën, Petraq Mersinin, Genc Byrazerin, dhe Naile Abazin.

Hetimet:

Në dosjen e SPAK, nënvizohet se ish-zv/ministri Klodian Rjepaj dhe biznesmeni Ilir Rrapaj kanë njohje të hershme dhe ata kanë studiuar në Universitetin e Mjekësisë në vitet 1991 dhe 1994. Këta të fundit kanë përfunduar studimet me Artan Leshin, që rezulton të jetë drejtor në kompaninë “Saniservice”.

Miqësinë e tyre ata e kanë vazhduar dhe kanë bashkëpunuar me qëllim që të përfitonin nga kontrata e sterilizimit. 

Sipas Prokurorisë së Posaçme, Ilir Rrapaj ka hyrë në territorin e Shqipërisë në dhjetor të 2014 me automjetin e Ministrisë së Shëndetësisë, i cili ishte në përdorim nga ish-zv-ministri Klodian Rjepaj.

Ky udhëtim është bërë pak ditë para se bashkimi i operatorëve të ekonomisë, ku përfshihet kompania "Investital" e Rrapajt të shpallej fitues për koncesionin. 

“Saniservice” është kompania koncesionare e sterilizimit, aksionet më të mëdha i ka “Investital LLC”, ku themelues është Ilir Rrapaj./CNA

 

Lajmet e fundit nga