web counter
LEXO PA REKLAMA!

SHKARKO APP

App Store
Google Play

Zjarret në Finiq vënë në rrezik banorët/ Evakuuohen dy familje

12 Gusht 2024, 20:30, Aktualitet CNA
Zjarret në Finiq vënë në rrezik banorët/ Evakuuohen dy
Foto nga zjarri

Forcat e emergjencave civile po vijojnë betejën me vatrat e zjarrit në disa zona në veri dhe jug të vendit.

Disa nga vatrat në fshatin Mesopotam të bashkisë së Finiqit nuk janë mundur të neutralizohen dhe për pasojë janë evakuuar dy familje.

Këtë e ka bërë të ditur ministri i Mbrojtjes, Pirro Vëngu, gjatë një vizite në këtë zonë.

“Ka 24 orë që luftohet me këto vatra të vështira. Është një terren shumë i thatë, bimësi e dendur. Fatmirësisht nuk kemi pasur zona të banuara të ekspozuara për momentin, por dy familje në lartësitë e Mesopotamit na është dashur t’i evakuuojmë me mbështetjen e policisë së qarkut. Të gjitha forcat do të vazhdojnë të qëndrojnë në terren”, theksoi Vëngu.

Sipas ministrit të Mbrojtjes, në këto operacione prioritet janë mbrojtja e zonave të banuara.

“Kemi vatra zjarri të konsiderueshme, por po ecim sipas përparësisë duke nisur nga zonat e banuara dhe më pas të alokojmë forca në zonat e mbrojtura apo në zona me rëndësi kulturore më pas. Përparësi janë jetët e njerëzve, siguria e personelit tonë, i cili ka tashmë dy muaj i angazhuar në shuarjen e vatrave të zjarrit. Nuk duhet ta harrojmë këtë pjesë. Është shumë e rëndësishme, me drejtorin kemi folur disa herë kohët e fundit edhe me drejtues bashkish apo prefektët e qarqeve të prekura: Parandalim, parandalim, parandalim! Këtu jemi në fakt në zona ku kemi një bashkëpunim të shkëlqyer edhe të banorëve të zonës që janë vetë të angazhuar, mirëmbajnë zonat, mirëmbajnë parcelat e tyre. Jemi pas një periudhë thatësire të konsiderueshme. Kjo nuk na ndihmon, padyshim prandaj vigjilenca mbetet maksimale, këtu në zonat e banuara’, nënvizoi Vëngu./ CNA





Lajmet e fundit nga