Vizita e kreut të SPAK-ut në SHBA/ VanHorn jep detaje: Dumani ishte për të diskutuar se si e luftojmë së bashku krimin

10 Shtator 2025, 15:04, Aktualitet CNA

Vizita e kreut të SPAK-ut në SHBA/ VanHorn jep detaje: Dumani ishte

E ngarkuara me punë e SHBA-së në Shqipëri, Nancy VanHorn, ka qenë e pranishme në konferencën e OSBE-së “Lidhja midis trafikimit të drogave të paligjshme dhe krimeve të dhunshme: Prirjet dhe kërcënimet e fundit kombëtare dhe rajonale”.

Gjatë fjalë së saj, VanHorn u ndal edhe te partneriteti me SPAK-un, për të cilin tha se është i ndërtuar mbi besim dhe angazhim. VanHorn tha se përmes partneritetit mes SPAK-ut dhe Departamentit amerikan të Drejtësisë, Prokuroria e Posaçme shënjestron kriminelët në Shqipëri dhe Amerikën e Jugut.

Më tej ajo u shpreh se SPAK trajton një tjetër aspekt, financat e paligjshme dhe pastrimin e parave.

Gjithashtu gjatë fjalës së mbajtur ajo u ndal edhe te zgjedhja e kreut të SPAK-ut dhe kreut të BKH-së për të cilët tha se SHBaA e pret me integritet zgjedhjen e tyre.

“Partneriteti ynë me SPAK-un, i ndërtuar mbi një themel besimi dhe angazhimi me Departamentin tonë të Drejtësisë, tregon ndikimin e bashkëpunimit efektiv. Përmes këtij partneriteti, SPAK shënjestron kriminelët këtu dhe në Amerikën e Jugut. Një hetim i muajit korrik çoi në kallëzimin penal të 16 të dyshuarve dhe sekuestrimin e gjashtë tonëve drogë me vlerë 411 milionë euro. Muajin e kaluar, SPAK-u shkatërroi grupe që trafikonin mbi 32 tonë kokainë nga Amerika e Jugut në Europë.

Puna e SPAK-ut trajton gjithashtu një aspekt tjetër të krimit të organizuar dhe trafikimit të narkotikëve: financat e paligjshme dhe pastrimin e parave. Shuma të mëdha të ardhurash të paligjshme të pastruara në të gjithë këtë rajon minojnë rritjen reale ekonomike. Këto përpjekje forcojnë sigurinë e Shqipërisë. Ato na ndihmojnë të luftojmë edhe kartelet në pragun e Amerikës që dobësojnë kufirin tonë, që përmbytin komunitetet me drogë dhe që kontribuojnë në emigracionin e paligjshëm në vendin tonë.

Kryeprokurori i Posaçëm, Dumani, ishte së fundmi në Uashington për të diskutuar me udhëheqjen tonë se si e luftojmë së bashku krimin këtu dhe në Shtetet e Bashkuara. Megjithatë, partneriteti i ligjzbatimit midis Departamentit tonë të Drejtësisë dhe SPAK-ut nuk u ndërtua brenda natës. Së bashku, duhet të mbrojmë atë që kemi ndërtuar.

SPAK-u është aq efektiv sa pavarësia e tij për të ndjekur kriminelët, pavarësisht se me kë janë të lidhur. Edhe SPAK-u u nënshtrohet ligjeve të Shqipërisë. Bazuar në ligj, z. Dumani, sado efektiv që ka qenë, do të zëvendësohet, sepse mandati i tij ka përfunduar. Procesi i përzgjedhjes së pasardhësit të z. Dumani duhet të jetë i paanshëm, transparent dhe i lirë nga ndikimet e jashtme.

Ata që dëshirojnë ta shohin Shqipërinë të vazhdojë luftën kundër krimit dhe korrupsionit, përfshirë partnerët ndërkombëtarë, janë shumë të interesuar për këtë proces dhe do ta ndjekin nga afër.

Shtetet e Bashkuara presin integritet në përzgjedhjen e Kryeprokurorit të ri të Posaçëm; ashtu siç presim për përzgjedhjen e Drejtorit të ardhshëm të BKH-së", tha VanHorn./CNA