Vijon tallja e PD-së me Avokatin e Popullit/ Akuzojnë Peleshin për falsifikimin e firmave që i hodhën vetë

12 Dhjetor 2025, 18:56, Aktualitet CNA

Vijon tallja e PD-së me Avokatin e Popullit/ Akuzojnë Peleshin

Pas talljeS me kandidatët në garë për Avokat i Popullit, “show” i PD-së lidhur me këtë çështje vijon edhe ditën e sotme.

Aktin e radhës të shfaqjes e ka njoftuar kreu i grupit parlamentar të PD-së, Gazment Bardhi që thotë se do të padisë kryetarin e Kuvendit për falsifikim dokumentash, në një kohë që ishin vetë deputetët e PD-së që hodhën firmat për Shabanin.

Por, Gazment Bardhi nuk mund të mashtrojë më demokratë e opozita. Kjo sepse, me zë dhe figurë të gjithë panë se si deputetët e PD-së mbrëmjen e djeshme braktisën sallën e parlamentit, në momentin që u bë votimi për zgjedhjen e Endrit Shabanit si Avokat i Popullit dhe u rikthyen pak minuta më vonë.

Ky gjest i ulët politik tregoi se Endrit Shabani ishte vetë kandidati i PD-së, dhe se si u shkel me këmbë kontributi i Adriana Kalasë, avokates së kauzave opozitare.

Reagimi i plotë:

Nëpërmjet falsifikimit të akteve parlamentare, Niko Peleshi i paraqiti dje Kuvendit të Shqipërisë për votim si kandidat të rrejshëm për Avokat të Popullit një njeri që nuk kishte mbështetjen me firmë të vlefshme të asnjë deputeti të vetëm, jo më të 28 deputetëve siç ligji kërkon për hedhjen në votim.

Pikërisht duke shpërdoruar detyrën, Kryetari i Kuvendit përmbushi ambicien e sëmurë të Edi Ramës për të kapur çdo pushtet, përfshirë institucionin e fundit kushtetues që nuk ishte nën kontrollin e qeverisë.

Mirëpo këtë herë Kryetari i Kuvendit ka tejkaluar çdo limit, duke keqpërdorur firmat e deputetëve të Kuvendit të Shqipërisë që ishin tërhequr nga propozimi i projektvendimit përkatës. Askush nuk mund të përdorë jashtë vullnetit të tyre nënshkrimet/propozimet e deputetëve të Kuvendit të Shqipërisë.

Për këtë arsye sot, kam autorizuar menjëherë ekipin ligjor të Grupit Parlamentar të Partisë Demokratike që të përgatisë kallëzim penal për “shpërdorim detyre” dhe “falsifikim të dokumenteve” parlamentare në bashkëpunim për Kryetarin e Kuvendit Niko Peleshin, dhe çdokënd tjetër që ka rol në këtë akt të paprecedent të Kuvendit. Ndërkohë që do të kërkoj nga grupi parlamentar autorizimin përkatës për t’iu drejtuar Gjykatës Kushtetuese për të verifikuar zgjedhjen e Avokatit të Popullit përmes një procedure parlamentare tërësisht të paligjshme.

Grupi Parlamentar i PD ka qenë dhe mbetet i vendosur që zgjedhja e organeve kushtetuese duhet të bëhet sipas një procedure transparente, gjithëpërfshirëse dhe që garanton pavarësinë e këtyre institucioneve, sikurse Raport Progresi i Komisionit Europian nënvizon. Vetëm kështu Shqipëria është në rrugën e duhur drejt Bashkimit Europian. Përndryshe provohet se kemi kaluar edhe zyrtarisht në një parti-shtet! /CNA