web counter
LEXO PA REKLAMA!

SHKARKO APP

App Store
Google Play

E fundit!

x

Shkelje disiplinore dhe zvarritje të proceseve/ ILD i ul pagën me 40% gjyqtarit të Sarandës

1 Tetor 2025, 13:21, Aktualitet CNA

Shkelje disiplinore dhe zvarritje të proceseve/ ILD i ul pagën me 40%

ILD mbajti sot seancën dëgjimore për kërkesën e Inspektorit të Lartë të Drejtësisë për procedim disiplinor ndaj magjistratit Sh.L., i cili është anëtar i Gjykatës së Sarandës prej 5 vitesh.

Inspektori i Lartë i Drejtësisë mori vendimin për uljen e pagës në masën 40% për një afat 1-vjeçar.

ID ka konstatuar shkelje të ndryshme nga gjyqtari i Sarandës si zvarritje sistematike dhe e përsëritur përtej afateve, mospërmbushje të detyrave dhe shkeljet janë konstatuar që në vitin e dytë të detyrës.

Vendimi:

"Inspektori i Lartë i Drejtësisë ka nisur hetimin disiplinor ndaj magjistratit Sh.L., gjyqtar pranë Gjykatës së Shkallës së Parë, Juridiksioni i Përgjithshëm Sarandë, bazuar në 13 ankesa për vonesa në zbardhjen e vendimeve të arsyetuara nga gjyqtari, shkelje disiplinore të parashikuara nga neni 102, pika 1, shkronja “d” i ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, i ndryshuar.

 

Raporti voluminoz i hetimit të inspektorëve të ILD-së, që ka bashkuar dy procedime dhe gjatë procesit ka ndryshuar e shtuar objekt hetimi për këtë gjyqtar, ka evidentuar vonesa të përsëritura të zbardhjes së vendimeve në tejkalim të afatit ligjor deri në 4 vite, vendime që i përkasin periudhës së viteve 2021, 2022, 2023. Raporti i inspektorëve të ILD konkludon se:

 

•    Nga ana e magjistratit janë ndërmarrë veprime/mosveprime në shkelje të afateve procedurale civile dhe penale të arsyetimit të vendimit gjyqësor, duke tejkaluar afatet tej çdo logjike, ku mosrespektimi i afateve ligjore nuk paraqitet si episod i izoluar, por si model i përsëritur në tri vite radhazi dhe në përmasa jashtë çdo standardi ligjor dhe profesional të afateve të vonesës. Zvarritja sistematike dhe e përsëritur përtej këtyre afateve, përbën tregues të qartë të mosrespektimit të përgjegjësive funksionale.

•    Pavarësisht për sa ka parashtruar magjistrati lidhur me ngarkesën në punë dhe për gjendjen e sistemit gjyqësor, nga analiza e situatës rezulton se ai nuk ka përmbushur në mënyrë të plotë dhe të qëndrueshme detyrimet ligjore dhe funksionale që i ngarkohen për arsyetimin dhe dorëzimin në kohë të vendimeve gjyqësore.

•    Magjistrati ka një vjetërsi në detyrë prej 5 vitesh si gjyqtar, ndërsa shkeljet disiplinore janë evidentuar në vitin e dytë  të tretë dhe të katërt të detyrës, tregues ky i eksperiencës së pakët në profesion. Por pavarësisht eksperiencës në detyrë, gjyqtari ka dëmtuar dukshëm imazhin e drejtësisë dhe besimin e publikut në të.

•    Shkelja disiplinore ka sjellë mos marrje në kohë të produktit të pritshëm nga gjykimi i një çështjeje të caktuar, vonesa në ushtrimin e të drejtës së ankimit apo edhe vonesa të theksuara në ekzekutimin e vendimit gjyqësor, si pasojë e mos arsyetimit në kohë të vendimeve, pra një drejtësi e mohuar.

•    Sjellja e magjistratit pas kryerjes së shkeljes, pas fillimit të hetimit dhe gjatë procedimit hetimit/procedimit disiplinor ka qenë bashkëpunuese.

 

ILD konkludon se veprimet/mosveprimet e ndërmarra nga ana e magjistratit Sh.L, përbëjnë “Shkelje të rëndë disiplinore” dhe i propozojnë Këshillit të Lartë Gjyqësor caktimin e masës disiplinore “Ulje e përkohshme e pagës deri në 40 për qind, për një periudhë jo më të gjatë se një vit”, parashikuar nga neni 105, pika 1, shkronja “c”, ndarja “i” dhe neni 108 i ligjit nr. 96/2016 “Për statusin e gjyqtarëve dhe të prokurorëve në Republikën e Shqipërisë”, i ndryshuar"/CNA

 

 

 

 

 

 

 

 

 

 

 

 

 

 

 

 

 

 





Lajmet e fundit nga