Porti i Durrësit/ Detajet nga padia e PD-së, të kallëzuarit dhe akuzat

13 Shkurt 2024, 13:13, Aktualitet CNA

Porti i Durrësit/ Detajet nga padia e PD-së, të kallëzuarit

Foto ilustruese

Ditën e sotme, në një konferencë për mediat, Partia Demokratike bëri me dije se do të ketë një padi në Gjykatën Kushtetuese dhe një kallëzim në SPAK mbi aferën e Portit të Durrësit.

PD ka dhënë detaje në lidhje me padinë dhe personat e kallëzuar dhe akuzat për të cilat do të paditen.

Personat e kallëzuar në SPAK janë kryeministri Edi Rama, anëtarët e Komitetit të Investimeve Strategjike dhe Grupi Negociator i Marrëveshjes Kuadër për Portin e Durrësit si dhe çdo shtetas tjetër i cili nga hetimi i SPAK-ut do të rezultojë me përgjegjësi për këtë aferë.

AKUZAT NDAJ TYRE / VEPRAT PENALE KONKRETE

PD akuzon Ramën, anëtarët e Komitetit të Investimeve Strategjike dhe Grupi Negociator i Marrëveshjes Kuadër për Portin e Durrësit për veprat penale “Shpërdorim i Detyrës”, e kryer në bashkëpunim (Nenet 25 dhe 248 të Kodit Penal) , “Korrupsion Pasiv”, e kryer në bashkëpunim (Nenet 25 dhe dhe 259 të Kodit Penal) dhe “Korrupsion Pasiv i Funksionarëve të Lartë Shtetërorë ose i të Zgjedhurve Vendorë”, (Nenet 25 dhe 260 të Kodit Penal).

PD sqaron se "sipas deklaratave të bëra publike nga Rama dhe Balluku, fillimisht u tha se Porti i Ri i Durrësit do të ndërtohej nga kompania arabe EMAAR GROUP.

Në fakt, kompania që u caktua ta bëjë këtë investim, zyrtarisht prej 2 miliardë eurosh, ishte kompania “Symphony Real Estate Development”sh.p.k., me kapital vetëm 10.000 lekë, e zotëruar tërësisht nga një kompani me adresë të selisë në ishujt Cayman (Parajsë Fiskale).

-Më pas, me vendim nr. 14/45 të Komitetit të Investimeve Strategjike (KIS) është vendosur pas 7 muajve, ndryshimi i Subjektit Investitor dhe konkretisht, jepet statusi investitor strategjik “Eagle Hills Real Estate Development" sh.p.k. pas të cilit është Alabar, duke vendosur, ndër të tjera, edhe zgjatjen e afatit të realizimit të projektit strategjik nga 7 vjet në 15 vjet.

-Me VKM nr. 685/2022 është ndryshuar sipërfaqja e pronës së transferuar në 818.318.98 m2 truall dhe 61.450. 51 m2 ndërtim, dhe Eagle Hills Real Estate Development është përcaktuar si subjekti që do të zhvillojë investimin në këtë tokë publike."/ CNA