Përdorimi i lëndëve piroteknike dhe aktet e dhunës në stadium/ Balla, porosi Rrumbullakut dhe Dukës

24 Shtator 2023, 11:35, Aktualitet CNA

Përdorimi i lëndëve piroteknike dhe aktet e dhunës në

Ministri i Brendshëm, Taulant Balla, ka zhvilluar një takim me kreun e Policisë së Shtetit, Muhamet Rrumbullaku, dhe kreun e FSHF-së, Armand Duka.

Si fokus i takimit ishte ndalimi i përdorimit të lëndëve piroteknike dhe aktet e dhunës në stadiume.

Për këtë do të ketë një bashkëpunim mes Policisë së Shtetit dhe FSHF-së, për t’u dhënë fund këtyre fenomeneve.

Ministri Balla u shpreh se Policia do të ketë më shumë përgjegjësi në administrimin e tifozëve dhe portave të sigurisë.

“Nisur nga raportimet që bëri Policia e Shtetit dhe FSHF pas analizës së eventit sportiv mes Kombëtares së Shqipërisë dhe asaj polake, disa nga konkluzionet janë me vend dhe duhet të ndiqen nga të dyja institucionet.

Gjej rastin ta përgëzoj FSHF për vendimet e Komisionit të Disiplinës për përjashtimin nga pjesëmarrja në aktivitetet sportive të personave që hodhën materiale në fushë apo përdorën flakadanë në ndeshjen me Poloninë.

Nga pamjet filmike, që u vunë në dispozicion, kuptohet qartë kush ishin personat e përfshirë dhe që do të mbajnë përgjegjësi penale.

Këta persona nëse tentohet që afrohen në stadium për ndeshjen e radhës, Policia do t'i shoqërojë për thyerje të vendimit administrativ.

Po të njëjtat penalitete, për kundërvajtjet për të gjithë stjuartët që kanë lejuar të hapet porta e sigurisë të hyjnë dhe të papajisur me biletë në 'Air Albania', por këtu duhen nxjerrë dhe përgjegjësitë e punonjësve të Policisë që kanë qenë prezentë në këto momente duhet të kishin ndërhyrë. Portat e sigurisë nga ky moment e tutje do të jenë përgjegjësi e Policisë së Shtetit. Ndaj ndeshjes me Poloninë ka pasur 12 mijë tentativa për bileta false, çdo qytetar ta ngulisë mirë në mendje se çdo dokument fals është vepër penale. Kur zbulohet me biletë false duhet të shoqërohet në Polici dhe të nisë hetimi penal.

Ne i kemi mundësitë të evidentojmë në gjithë 22.217 ulëset në stadium, evidentimin e emrit dhe përgjegjësisë. Dhe çdo tifoz që do ndjekë ndeshjen me Çekinë, ta ketë të qartë që ne dimë kush është ulur në atë ndenjëse dhe përgjegjësinë që ka.

Nga pamjet filmike të sistemit kuptohet qartë kush u përfshi në incidente dhe do të mbajë përgjegjësi penale.

Plani i masave për ndeshjen me Çekinë është një hap i madh i kalimit të përgjegjësisë nga Policia Private te Policia e Shtetit për të shkuar me gatishmërinë, e gjej rastin ta falënderoj Drejtorin e Policisë, për të marrë ne më shumë përgjegjësi. Natyrshëm Federata ta konsiderojë këtë bashkëpunim me PSh edhe një mënyrë se si mund të ndihmojë Policinë, e këtu dua ta falënderoj FShF që po ndihmon për ndërtimin e një fushe sportive për forcat 'Delta' në Vlorë.

Besoj të gjejmë mundësi të tjera bashkëpunimi”, u shpreh Balla./ CNA