Pas denoncimit në media, reagojnë përfaqësuesit e PD-së për rrugën e dëmtuar në Rrëmenj

24 Mars 2026, 18:13, Aktualitet CNA

Pas lajmit të transmetuar në CNA për dëmtimin e rrugës së sapo rikonstruktuar në fshatin Rrëmenj, njësia administrative Buçimas, në terren kanë zbritur edhe përfaqësues të Partisë Demokratike, të cilët e cilësojnë situatën si një rast flagrant abuzimi me fondet publike.

Deputetja e PD për qarkun e Korçës, Ledina Alolli, e shoqëruar nga kryetari i degës së PD në Pogradec, inspektoi nga afër gjendjen e rrugës, duke theksuar se investimi i kryer vetëm pak muaj më parë ka degraduar në mënyrë të menjëhershme.

“Së bashku me kryetarin e PD të degës Pogradec jemi sot këtu në fshatin Rrëmenj, në njësinë administrative Buçimas, për të parë nga afër problematikën e rrugës. Pamjet tregojnë se çfarë ka ndodhur me rrugën, e cila është një abuzim me investimet publike dhe një model i pastër i korrupsionit. Kjo rrugë është inauguruar vetëm pak muaj më parë, një investim që ka kushtuar 800 milion lekë dhe siç e shihni, rezultati është i dukshëm. Banorët e kësaj zone kanë probleme të mëdha, sepse jeta e tyre është e pasigurt kur kalojnë këtu. Kjo rrugë mund të çojë deri në bllokimin e kësaj lagjeje për të komunikuar me pjesën tjetër. U bëjmë thirrje organeve kompetente të marrin masa dhe të verifikojnë mënyrën e kryerjes së punimeve, si dhe përgjegjësinë e kompanisë”, shprehet Alolli.

Edhe kryetari i degës së PD në Pogradec, Oligert Muçllari, ngriti akuza të drejtpërdrejta ndaj bashkisë, duke e konsideruar këtë investim si të dështuar dhe të papërgjegjshëm.

“Jemi në fshatin Rrëmenj për të denoncuar një rast flagrant dhe të papërgjegjshëm nga ana e bashkisë Pogradec. Ky është një investim mbi 800 milion lekë, i cili edhe pse është inauguruar para pak kohësh, sot është thuajse i shkatërruar. Kjo tregon papërgjegjshmërinë në menaxhimin e fondeve publike dhe cilësinë e dobët të punimeve jo vetëm në këtë fshat, por në të gjithë territorin e bashkisë. I bëjmë thirrje organeve ligjzbatuese të hetojnë këtë rast, pasi kemi të bëjmë me një abuzim të qartë me taksat e qytetarëve. Ne si Partia Demokratike dënojmë këto akte dhe jemi në mbështetje të banorëve”, tha Muçllari.

Ndërkohë, banorët e zonës vijojnë të kërkojnë ndërhyrje të menjëhershme për riparimin e rrugës, duke theksuar se dëmtimet po përkeqësohen dita-ditës dhe po rrezikojnë izolimin e lagjes. Ata kërkojnë që institucionet përgjegjëse të marrin masa konkrete për të garantuar sigurinë dhe rikthimin e investimit në funksion të komunitetit. /CNA