web counter
LEXO PA REKLAMA!

SHKARKO APP

App Store
Google Play

E fundit!

x

Nata e dytë e Festës së Birrës/ Atmosferë elektrizuese në Korçë

15 Gusht 2025, 16:34, Aktualitet CNA

Nata e dytë e Festës së Birrës/ Atmosferë elektrizuese

Korça ka ndezur edhe njëherë zemrën e verës shqiptare me natën e dytë të Festës së Birrës, një prej ngjarjeve më të mëdha turistike dhe kulturore në vend. Mbrëmja solli një atmosferë elektrizuese, ku vendasit dhe turistët u bënë bashkë për të shijuar jo vetëm birrën e freskët, por edhe gatimet tradicionale dhe muzikën live nga artistët e njohur.

Qyteti u mbush me vizitorë që nga orët e pasdites, të cilët u grumbulluan në sheshin e festës pranë Terminalit, ku aroma e gatimeve të vendit ndërthurej me tingujt e provave muzikore. Skena e madhe u ndez me performancat energjike të Soni Malaj, Genës, grupit Magic Four dhe DJ korçar Niko Dj, duke e kthyer natën e gushtit në një maratonë këngësh e kërcimesh.

Nata e dytë e Festës së Birrës/ Atmosferë elektrizuese

Atmosfera ishte një përzierje e gëzimit, shoqërisë dhe dashurisë për Korçën. Nga Shtetet e Bashkuara të Amerikës, një korçare që rikthehej pas shumë vitesh tregoi emocionet e saj.

"Unë jam nga Korça dhe jetoj në ShBA. Vij për herë të parë këtu. Është shume festive atmosfera dhe më pëlqen shumë. Kam ardhur me motrat e mia dhe me pjesëtarë të tjerë të familjes dhe po kënaqemi shumë. Koncerti ka filluar, është plot këtu dhe njerëzit janë të lumtur e të gëzuar."

Nga Durrësi, një grup vizitorësh e përshkroi festën si një eksperiencë që e përsërisin çdo vit.

"Ne vijmë nga Durrësi. Vijmë për herë të tretë në Festën e Birrës. Është shumë bukur, janë mbledhur të gjithë, më bukur s'ka. Edhe me ushqime të freskëta, të bollshme, të mira në çmim dhe presim të këndojnë këngëtarët. Ne do të ikim ditën e shtunë, jemi për disa ditë këtu."

Nata e dytë e Festës së Birrës/ Atmosferë elektrizuese

Një çift rumun, që prej tre vitesh nuk e humb asnjë edicion, tha se kjo është festa më e mirë në Ballkan. Ky event, sipas Gabrielit, nuk është parë as në shtete të tjera të Ballkanit. Birrat, ushqimi, atmosfera e këngëtarët e bëjnë shumë të dashur qëndrimin e tyre në festë.

"Jam Gabriel, erdha me bashkëshorten time, jemi nga Rumania. Kam tre vite që vij çdo vit dhe ky është festivali më i mirë në Ballkan. Isha në Greqi, Mal të Zi, Maqedoni, dhe s'kam parë festival të tjerë në këto shtete. Më pëlqejnë të gjitha birrat, ushqimi është më i miri. Kam provuar edhe në Boboshticë, gatuajnë ngadalë dhe i bëjnë shumë të shijshme. Do të qëndroj deri në fund të festivalit. Këngëtarët janë shumë të mirë, nga këto do të ikim në Sarandë."

Nata e dytë e Festës së Birrës/ Atmosferë elektrizuese

Edhe vizitorë nga Amerika e largët, që e kanë vizituar Korçën që në fëmijëri, shprehen të entuziazmuar për përvojën e parë në këtë festë.

"Unë vij nga Amerika, kam qenë në Korçë që kur isha 5 muajshe, dhe pothuajse çdo vit vij këtu. Është hera e parë që vij në Festa e Birrës. Kam provuar kërnacet, hot dogs dhe kam pirë 4 birra. Deri tani shumë mirë po kalojmë."

Mes gotave të ngritura, shijeve të birrës së freskët, aromës së gatimeve tradicionale dhe tingujve që zgjasin deri në orët e vona, Festa e Birrës vazhdon të tërheqë vizitorë nga e gjithë Shqipëria dhe jashtë saj. Natë pas nate, Korça po dëshmon se di të mikpresë, të argëtojë dhe të krijojë kujtime të paharrueshme për këdo që bëhet pjesë e saj./CNA





Lajmet e fundit nga