web counter
LEXO PA REKLAMA!

SHKARKO APP

App Store
Google Play

E fundit!

x

Kush e tradhtoi “padronin”

26 Korrik 2025, 11:23, Aktualitet CNA
Kush e tradhtoi “padronin”
Erion Veliaj dhe Ajola Xoxa

Të mërkurën e 23 korrikut, Prokuroria e Posaçme kundër Korrupsionit dhe Krimit të Organizuar i komunikoi akuzat kryebashkiakut Erion Veliaj, i cili prej 10 shkurtit gjendet në burgun e Durrësit.

13 akuza në total për disa vepra të rënda penale që përfshijnë korrupsion, fshehje pasurie, pastrim të produkteve të veprës penale dhe futjen e sendeve të ndaluara në qeli.

Pas njoftimit të SPAK-ut për komunikimin e akuzave ndaj Veliajt, bashkëshortes së tij, Ajola Xoxës dhe bashkëpunëtorëve të tyre dhe të tjerë personave të përfshirë në dosje filluan të zbuloheshin aktet.

Përgjatë javës janë zbuluar personat që tradhtuan “padronin” e tyre duke bashkëpunuar me drejtësinë.

Disa emra kalojnë përmes bashkëshortes së tij Ajola Xoxa, njerëzit më besnikë të saj.

E para që u kthye në të penduarën e drejtësisë ishte Adela Kondakçiu, ish-financierja e Ajola Xoxës, e cila ka dijeni për shumë fatura dhe skema të OJF-ve të Ajola Xoxës, fakte dhe prova që i kanë shërbyer SPAK-ut në hetime.

Kondakçiu është një nga personat kyç që është trajtuar edhe në dosjen hetimore. Duke iu referuar edhe komunikimeve të zbardhura rezulton se është në dijeni të pothuajse gjithçkaje mbi faturat fiktive dhe skemat që janë përdorur në OJF-të e Ajola Xoxës.

Personi i dytë që ka shitur padronin është Gentian Sula i NOA-s, i cili, në fakt, fillimisht u raportua se ishte njeriu që kishte dalë garant për 115 mijë eurot, por siç u raportua nga mediat, edhe nga CNA, ai ka ndryshuar dëshminë e tij dhe ka deklaruar se gjithçka e ka përgatitur Ajola Xoxa.

E treta është bashkëshortja e mikut të Veliajt, Elman Abule, Marisa Nito Abule. Kjo e fundit ka dhënë dëshmi me rëndësi sa i përket apartamentit të sekuestruar nga GJKKO në 22 maj të këtij viti.

Marisa Nito Abule në dëshminë e saj ka deklaruar se Ajola i ka treguar që kishte hapësirë të ngushtë në shtëpi dhe kërkonte katin e tretë, pikërisht tek apartamenti që ka sekuestruar SPAK-u, ku pretendohej se dy katet ishin thjesht dhe vetëm të Erion Veliajt, kurse kati i tretë më parë ishte përdorur nga aktori Gaz Paja, më pas nga persona të tjerë dhe nuk ishte mbajtur nga Erion Veliaj.

Kush e tradhtoi “padronin”
Marisa Nito Abule

SPAK-u ka gjetur mobilie gjatë kontrolleve, të porositura nga Ajola Xoxa, në katin e tretë, dhe gjithashtu tashmë është edhe dëshmia e Marisa Abules, e cila thekson në SPAK se ka qenë vetë Ajola që i ka thënë se hapësira ka qenë e ngushtë dhe ka kërkuar më shumë zgjerim, pikërisht tek i njëjti objekt i sekuestruar.

Një tjetër dëshmi interesante ishte ajo e gardianit Fatjon Baci. Në dëshminë e tij, Baci tregon se Veliaj kishte shfrytëzuar telefonin e tij për të komunikuar me të vëllanë dhe të shoqen, duke pranuar se i kishte dhënë telefonin për shkak të frikës nga pushteti.

Sipas akteve, mund të ketë edhe persona të tjerë, të cilët kanë dhënë dëshmitë e tyre dhe kanë rënduar edhe situatën penale të Erion Veliajt dhe Ajola Xoxës.

Tashmë SPAK-u ka mbyllur hetimet duke dërguar në gjykatë dosjen voluminoze me qindra faqe akuzë të Veliajt dhe Xoxës, me fakte dhe prova që implikojnë rëndë kryebashkiakun e Tiranës, Erion Veliaj, i cili rrezikon 7-15 vite heqje lirie./ CNA





Lajmet e fundit nga