Kim, mesazh Ramës: Detyra e gazetarëve është të pyesin, zyrtarët të përgjigjen

15 Korrik 2022, 18:43, Aktualitet CNA

Kim, mesazh Ramës: Detyra e gazetarëve është të pyesin,

Ambasadorja amerikane Yuri Kim

Ambasadorja amerikane, Yuri Kim, u ka drejtuar një mesazh gazetarëve, referuar rasteve kur kryeministri Edi Rama refuzon t’u përgjigjet pyetjeve të tyre, madje i dërgon ata për riedukim.

Gjatë ceremonisë së diplomimit të studentëve të Laboratorit të Gazetarisë Investiguese, Kim u shpreh se është detyrë e gazetarëve që të bëjnë pyetje.

Sipas Kim, çdo zyrtar duhet t’u përgjigjet gazetarëve, edhe nëse nuk i pëlqen pyetja e drejtuar.

Ajo theksoi se gazetarët duhet të përsërisin vazhdimisht pyetjen, nëse nuk marrin përgjigje.

“Është detyra juaj profesionale dhe një shërbim publik të bëni pyetje. Është detyra e zyrtarëve, duan apo nuk duan ata, që t’u përgjigjen pyetjeve. Nëse zyrtarët nuk i përgjigjen pyetjes suaj, përsëriteni dhe përsëriteni sërish.

Kërkojuni kolegëve tuaj të bëjnë të njëjtën pyetje derisa zyrtarët, pavarësisht se kush janë ata, të përgjigjen. Shpresoj që të vazhdoni të punoni fort për të ndriçuar, edukuar dhe për të qenë rojtarët e së vërtetës që i duhen demokracisë së Shqipërisë”, tha ambasadorja.

Reagimi i plotë:

“Ju nxis që të vazhdoni të mësoni, por edhe të edukoni të tjerët, përfshirë edhe zyrtarët që intervistoni, mbi dy gjëra të rëndësishme: se është detyra juaj të bëni pyetje të vështira dhe se është detyra e tyre të japin përgjigje. Është detyra juaj profesionale dhe një shërbim publik të bëni pyetje. Është detyra e zyrtarëve, duan apo nuk duan ata, që t’iu përgjigjen pyetjeve. Nëse zyrtarët nuk u përgjigjen pyetjes tuaj, përsëriteni dhe përsëriteni sërish. Kërkojuni kolegëve tuaj të bëjnë të njëjtën pyetje derisa zyrtarët, pavarësisht se kush janë ata, të përgjigjen. Shpresoj që të vazhdoni të punoni fort për të ndriçuar, edukuar dhe për të qenë rojtarët e së vërtetës që i duhen demokracisë së Shqipërisë”, u tha Ambasadorja e SHBA-së Yuri Kim studentëve të Laboratorit të Gazetarisë Investiguese, gjatë ceremonisë së diplomimit të tyre. Ambasadorja dhe studentët biseduan mbi rëndësinë e gazetarisë investiguese për demokracinë dhe luftën kundër korrupsionit, gjë e cila është në thelbin e Laboratorit të Gazetarisë Investiguese, një program i mbështetur nga Ambasada e Shteteve të Bashkuara në Tiranë./CNA.al