web counter
LEXO PA REKLAMA!

SHKARKO APP

App Store
Google Play

Këshilltarët e huaj të Veliajt, me skenar filmi për Netflix

29 Tetor 2025, 10:58, Aktualitet REDAKSIONALE
Këshilltarët e huaj të Veliajt, me skenar filmi për Netflix
Foto ilustruese

Pavarësisht se i binin pak si gjatë, vija e mbrojtjes së shpërndarë dje nga këshilltarët e huaj të Erion Veliajt ishte, që ky i fundit është viktimë e një skenari për shkarkimin e tij si kryetar i Bashkisë Tiranë. Sipas asaj vije mbrojtjeje, qëllimi final i skenarit ishte shkarkimi i Veliajt si kryetar bashkie.

Mjeti i përdorur për të arritur qëllimin ishte burgosja. Pra, Erion Veliajn e paskan futur në burg, që të mund ta hiqnin si kryetar bashkie.

Ky skenar cilësohet nga mbrojtësit e shtrenjtë, si persekutim politik. Por meqë e nisën, duhet të thonë se kujt dhe pse Veliaj u duhej i hequr si kryetar i Bashkisë Tiranë. Sepse qëllimi, sipas tyre, paska qenë heqja e Veliajt nga bashkia. Kështu thonë!

 

Po kur lindi, pse dhe me kë zhvillohej konflikti?

Dhe konflikti duhet të ketë qenë shumë i madh derisa qenkan bërë të gjithë bashkë që ta heqin si kryetar bashkie. D.m.th. në një skenar të hartuar paraprakisht, në unison dhe me një program pune ku secili kishte të qartë rolin e vet, të gjithë SPAK, GKKKO,  Këshilli Bashkiak, Kryeministri e Presidenti u bënë bashkë për të hequr Enion Veliajn nga bashkia.

Dhe për të bërë të mundur shkarkimin, e paskan futur në burg. Mos qeshni! Kështu thonë këshilltarët e jashtëm të Veliajt.

Po a mos po thonë kështu, se futja në burg qenka arsye e mjaftueshme që justifikon shkarkimin?

Derisa mbrojtësit e jashtëm shkruajnë që gjithë ky organizim i strukturuar politiko-magjistral paskësh gjetur si mjet për shkuar te shkarkimi administrativ, burgun penal, atëherë ata po thonë që mjeti qenkësh zgjedhur pikërisht për të justifikuar shkarkimin.

Pra, burgu e justifikuaka shkarkimin! Ky skenar grotesk u shpërnda si parapritë e seancës në Gjykatën Kushtetuese.

Por në Gjykatë Kushtetuese nuk diskutohet dot burgu. Aq më pak mund të bëhet vlerësimi i këtij skenarit që mund të bëjë entuziast Veliajn, por vështirë se “hahet” dot.

Këta këshilltarët e jashtëm të Veliajt duhet t’i sqarojë dikush se me çfarë merret Gjykata Kushtetuese në Shqipëri, se ata duket sikur paskan në plan t’i kërkojnë Gjykatës Kushtetuese ta nxjerrë nga burgu Veliajn. Sepse burgu e justifikon shkarkimin. Por nëse bie burgu, bie dhe shkarkimi.

Këta amerikanët e shtrenjtë edhe pak ditë më parë u ngatërruan kësisoj me letrat e veta dhe duken pak si tafti-bafti te ky shërbimi që i japin Veliajt.

Kështu kur kërkuan lirimin nga burgu të Veliajt në Gjykatën e Lartë, argumentonin se Veliaj “duhej liruar nga burgu se është shkarkuar”.

Në të njëjtën ditë po depozitonin në Gjykatën Kushtetuese kërkesën për shfuqizimin e shkarkimit si antikushtetues!

Në Gjykatë Kushtetuese kërkojnë pavlefshmërinë e shkarkimit si antikushtetues dhe në të njëjtën ditë shpërndajnë një material ku e trajtojnë shkarkimin si skenar filmi NETFLIX.

Triller politik thonë!

Por edhe këtë si bocet e kanë nxjerrë në shitje, se nuk janë lodhur fare të detajojnë diçka më shumë.

Jurisprudenca bëhet dhe zhvillohet brenda kulturës ligjore përkatëse.

Ndaj një amerikan nuk këshillon dot në një kulturë ligjore diametralisht të kundërt me atë që njeh dhe e ka studiuar amerikani i shkretë. Aq më shumë kur amerikani është ekspert i së drejtës tregtare dhe jurisprudencën e rastit e zhvillon në të drejtë administrative publike të nivelit më të lartë deri kushtetues.

Kur një amerikan rreket të bëjë jurisprudencë në Shqipëri prodhon skenarë për Netflix. Dhe as nuk lodhesh ta qëndisësh kur e ke të shitur shtrenjtë pa e shkruar akoma.

Pastaj kur je mësuar ta shohësh veten si personazh Netflix-i, kështu e pëson nga realiteti. Ndaj i vetmi që mund ta blejë këtë skenar është Erion Veliaj.

I vetmi konkluzioni është që Erion Veliajt nuk i kanë mjaftuar 8 muaj. Do t'i duhet ndoshta një vit që të kuptojë çfarë i ka ndodhur.

Këta skenarët me trillera politikë nuk e ndihmojnë dot./ CNA

 





Lajmet e fundit nga