Ilaçe të skaduara dhe 360 lekë në ditë për person/ Skandali në azilin e Shkodrës

20 Shkurt 2023, 17:11, Aktualitet CNA

Ilaçe të skaduara dhe 360 lekë në ditë për

Në një raport të publikuar, Avokati i Popullit ngre alarmin se të moshuarit në shtëpinë e të moshuarve në Shkodër janë të rrezikuar nga ilaçet e skaduara.

Sipas tij në farmaci ishin konstatuar disa ilace të cilat kishin skaduar deri në tre muaj më parë.

“Grupi i punës konstatoi se në farmaci kishte disa ilace të cilat kishin skaduar rishtazi (deri në tre muaj më parë). Ky fakt ju bë me dije si mjekut ashtu dhe drejtuesit të institucionit të cilëve ju kërkua nisja e menjëhershme e procedurës për asgjësimin e tyre”.

Raporti tregon se kuota ushqimore ishte në vlerën 360 lekë në ditë për çdo person që trajtohet në qendren e të moshuarve.

“Kuota ushqimore ishte në vlerën 360 lekë në ditë për çdo person që trajtohet në qendër, e cila së fundmi ishte e pamjaftueshme për përfituesit për shkak edhe të ndryshimeve të reflektuara në çmimet e tregut dhe me inflacion galopant”, përfundon raporti.

Problematika të tjera në këtë qendër ishin mungesa e kapaciteve të mjaftueshme njerëzore. Avokati i Popullit ka parashtruar për këto problematika 5 rekomandime.

"Marrjen e masave përkatëse për shtim në organikë të pozicionit të punës me kujdestarë, psikolog dhe mjek me kohë të plotë për të ofruar shërbim cilësor në shtëpinë të moshuar në Shkodër në funksion të jetesës së tyre me dinjitet e në mënyrën më të mirë të mundshme, duke gëzuar plotësisht të drejtat e tyre themelore të sanksionuara në aktet ligjore e nënligjore fuqi.

Marrjen e masave të menjëhershme për fillimin e procedurës për asgjësimin e të gjitha medikamenteve të cilat ju ka kaluar afati i përdorimit dhe zëvendësimin e tyre me medikamente të reja. Marrjen e masave për shtesë në pagë sipas vështirësisë, për personelin që kujdeset për kategorinë e të moshuarve me probleme të shëndetit mendor. Marrjen e masave për ngritjen e një qendre socio-sanitare, ku të trajtohen me përkujdesje të veçantë të moshuarit me probleme të rënda shëndetësore. Marrjen e masave të menjëhershme për larminë e ushqimit sipas produkteve të stinës, si dhe rritjen e kuotave ushqimore për të moshuarit”, shkruhet më tej./ CNA.al