I riu nga Thethi la emigracionin për vendlindjen/ Harusha: Kryeministri të mbajë fjalën që dha

11 Korrik 2025, 13:45, Aktualitet CNA

I riu nga Thethi la emigracionin për vendlindjen/ Harusha: Kryeministri

Klodian Harusha, një 23-vjeçar nga Thethi, u kthye nga emigracioni për të investuar në fshat kursimet e tij minimale nga puna në Itali, por fadromat e IKMT-së kanë vënë në listë shembjen e ndërtesës ende pa e përfunduar. 23-vjeçari sakrifikoi duke fjetur në këtë rulotë të vjetër ndërsa mori një kredi prej 30 mijë eurosh. Tashmë bashkë me gjobën e IKMT-së borxhi i të riut shkon afërsisht në 90 mijë euro.

"Unë jam Klodian Harusha, 23 vjeç. Jam banor i Thethit. Kam investuar këtu. Kam qenë emigrant. Kam luajtur si futbollist në Itali për 6 vite. U ktheva me idenë se ka të ardhme dhe këtu, por fatkeqësisht më duket nuk ka. Kam ardhur me rreth 7 mijë euro të kursyera. U ktheva me fjalën e kryeministrit sepse tha kthehuni të rinjtë e investoni në tokat e të parëve tuaj. Unë u ktheva. Jam munduar të krijoj një jetesë në vete. Kjo këtu ka 1 vit që pikon, është me NIPT e çdo gjë. Jam sorollatur në bashki, asnjë info për Paketën e Maleve. Më ka nxjerrë edhe jashtë në bashki duke më thënë shko kërko diku tjetër informacion. Kryeministri tha vjet e kemi miratuar Paketën e Maleve. Unë bëra diçka druri, e cila mund të çmontohet për 2 orë. Kanë ardhur më kanë vendosur 58 mijë euro gjobë e më thanë do të shembet bashkë me lokalin që ka 2 vite me NIPT e çdo gjë. Është ndërtesë 1 kat e gjysmë dhe është vënë gjobë e tillë. Jam i zhgënjyer, kam ardhur për të krijuar një jetë këtu, sot jam 95 mijë euro borxh e nuk di nga t'ia nisi. Jam munduar të investoj në tokën time, do të doja një rrugëzgjidhje."

Në fund i riu ka edhe një mesazh për kryeministrin Rama, i cili e thirri për t'u kthyer nga emigracioni e sot po e dëbon sërish.

"Kryeministrit do t'i kisha thënë të vërë në zbatim fjalët që ka thënë për të rinjtë. Rruga e vetme duket se është të ikësh si të gjithë të tjerët. Nëse e shembin do të iki, nuk kam çfarë të bëj më këtu. Thethjanë me toka 'të xanuna' nuk ka, jemi prej 5 shekujsh këtu. Është turp të quash tokat e thethjanëve toka 'të xanuna', këtu po bëhet një katastrofë".

Aksioni i IKMT-së vijon në ditën e pestë me prishjen e ndërtimeve pa leje në fshatin turistik të Thethit./ CNA