web counter
LEXO PA REKLAMA!

SHKARKO APP

App Store
Google Play

“DigitAlb” fushatë kërcënuese dyqaneve, “mos tregtoni 'TIBO'”

13 Gusht 2022, 17:43, Aktualitet CNA
“DigitAlb” fushatë kërcënuese dyqaneve, “mos
Fotomontazh - Dyqani i "Digitalb" dhe mesazhet drejtuar pikave të shitjeve

“DigitAlb” ka nisur të kërcënojë shitësit e pavarur të paketave televizive, që të mos tregtojnë në dyqanet e tyre edhe shërbimet e platformës “TIBO”.

Kompania “DigitAlb” u ka nisur atyre email-e ku u kërkon që “në asnjë mënyrë të mos mbajnë/tregtojnë 'TIBO'” në të kundërtën do të ndërpresë bashkëpunimin.

“Strukturat në terren janë në monitorim të këtij fenomeni dhe nga sot ato POS [Points Of Sales/Pika Shitjesh] që do të konstatohet se ofrojnë 'TIBO', do të merren masa të menjëhershme me heqjen e të drejtës së shitjes së produkteve të kompanisë 'DigitAlb'” – thuhet në e-mailin e shpërndarë.

Shitësit e pavarur të paketave televizive njihen rëndomtë si distributorë, por ata janë kryesisht subjekte private, që si aktivitet qendror kanë shërbimin e pagesave elektronike të shërbimeve të ndryshme, shitjen e aksesorëve për celularë apo produkte të tjera të ngjashme.

Zakonisht platformat televizive lidhin bashkëpunim me këto subjekte, për të pasur shtrirje më të madhe të shitjeve në zona jashtë Tiranës. Kjo përgjithësisht bëhet për të ulur kostot e mbajtjes së një dyqani zyrtar nga vetë kompania.

Askush nuk mund t’i detyrojë subjektet private për aktivitetin e tyre, aq më tepër të kushtëzojë bashkëpunimin me shantazhe.

E drejta tregtare garantohet me ligj dhe shumica e dyqaneve po refuzojnë t’u binden kërcënimeve të “DigitAlb”, që konfirmon edhe njëherë se nuk e pëlqen konkurrencën.

Ngjashëm si fushata me kronika televizive kundër “TIBO”-s, fushata me shtrëngime ndaj shitësve privatë ka nisur në një kohë kur “DigitAlb” ka humbur të drejtat e transmetimit të futbollit shqiptar.

Lëvizja e fundit ka për synim pengimin e qytetarëve, e aq më shumë abonentëve të “DigitAlb”, që të kalojnë dhe abonohen në “TIBO”.

Një vit më parë “DigitAlb” humbi të drejtat e futbollit italian dhe në mënyrë hakmarrëse prishi njëanësisht bashkëpunimin me platformën “TIBO”.

“TIBO” e ka paditur “DigitAlb”-in në gjyq për prishjen e njëanshme të kontratës 10-vjeçare të bashkëpunimit dhe në tavolinë është në diskutim një dëmshpërblim i majmë prej 8 milionë eurosh./ CNA.al





Lajmet e fundit nga