Del emri i Alda Klosit/ Zbardhen bisedat me “ushtaren” e Klodian Zotos

9 Dhjetor 2023, 21:11, Aktualitet CNA

Alda Klosi

Nga dosja hetimore e SPAK për inceneratorin e Tiranës, e siguruar nga CNA janë zbardhur disa e-maile të shkëmbyera mes Alda Klosit me funksionin Drejtoreshë e Drejtorisë së Koncesioneve në Ministrine e Financave me Alba Thomën Drejtoreshë e Drejtorisë Juridike të Ministrisë së Mjedisit.

Sipas të dhënave në dosje, Alda Klosi i ka dërguar një e-mail Alba Thomës, ku i kërkonte të qartësonte mospërputhjet që shfaqeshin në relacionin e bonusit, ku ishte thënë se nuk do të kishte efekte shtesë në buxhetin e shtetit, por ishin hasur disa mospërputhje, të cilat ajo duhet t’i qartësonte.

Thoma i përgjigjet Klosit se, nuk ka të bëjë me efekte shtesë në kuptimin e mirëfilltë të tyre pasi nuk do t’i akordohen Ministrisë së Mbrojtjes por Bashkisë Tiranë si pjesë e grantit që ato marrin nga qeveria Qëndrore për realizimin e detyrimeve të saj.

Nga ana tjetër i shkruan se, VKM-ja e bonusit është miratuar dhe për vazhdimin e procedurave koncesionare mbetet vetëm miratimi i Ministrisë së Financave.

“Nga procesverbali i këqyrjes dhe marrjes së të dhënave të administruara tek kompjuteri i sekuestruar, i shtetasit klodian Zoto, sipas aktit të ekspertimit teknik kompjuterik, nr.93, datë 21.04.2022, rezulton se më date 19.01.2017, ora 11:49, nga adresa elektronike e shtetases Alda Klosi, me funksionin Drejtoreshë e Drejtorisë së Koncesioneve në Ministrine e Financave, është dërguar email në drejtim të shtetases Alba Thoma me emërtimin "përgjigje për bonusin M Mjedisit inc tirana", me përmbajtje: " Të lutem shikoje me vëmendje këtë shkresë pasi në relacionin e bonusit keni thënë qe nuk do të ketë efekte shtesë në buxhetin e shtetit. Në këndvështrimin tonë ka një mosperputhje të cilën duhet ta qartësosh. Do të të nis edhe komentet e bëra nga Drejtoria e Analizës Buxhetore FLM, Alda".

Ketij emaili i është përgjigjur shtetasja Alba Thoma, me email-in e dates 19.01.2017, ora 12:14, dërguar shtetases Ala Klosi, me përmbajtje: "Alda, Nuk kemi të bëjmë me efekte shtesë në kuptimin e mirëfilltë të tyre pasi nuk do t’i akordohen MM-se por Bashkisë Tirane si pjesë e grantit që ato marrin nga qeveria Qëndrore për realizimin e detyrimeve të saj. Kjo është arsyeja që nuk e kemi të parashikuar në tavanet tona buxhetore. Gjithsesi prandaj jua kemi përcjellë për miratim procedurën pasi Qeveria Qendrore do t'i akordojë Bashkisë fondet për depozitimin e mbetjeve në impjant si dhe për të mbuluar kostot e shpronësimit. Nga ana tjetër të kujtoj se VKM bonusit është miratuar tashmë dhe për vazhdimin e procedurave koncesionare mbetet vetëm miratimi juaj. Flm. Alba"”, thuhet në dosje.

Më tej shkëmbimi i e-maileve vijon dhe Alda Klosi i kërkon planin e biznesit i cili mungonte në praktikën e përcjellë.

“Po me datë 19.01.2017, ora 12:17 shtetasja Alda Klosi i kthen përgjigje shtetases Alba Thoma, nëpërmjet email-it, me permbajtje: "Flm, Alba. Te lutem jam në pritje të dergimit të planit të biznesit i cili mungon në praktikën e përcjellë. Ka folur edhe me Bledin por akoma nuk ka ardhur materiali. FLM, Alda.".

Po me datë 19.01.2017, ora 12:37, shtetasja Alba Thoma i ka kthyer përgjigje shtetases Alda Klosi, me përmbajtje: "Përshendetje Alda, Bashkëlidhur janë dok e përpunuar mbi bazë të bisedës sonë. Ndërhyrjet janë me të kuqe. Gjithashtu, bashkëlidhur është edhe plani i biznesit. Nëse janë ok për ju më thuaj. Flm. Alba"”, theksohet në dosjen hetimore.

Sipas të dhënave në dosje, Alba Thoma nën cilësinë e Drejtoreshës së Drejtorise Juridike në Ministrisë së Mjedisit gjithçka kishte komunikuar me Alda Klosin, kishte informuar Klodian Zoton.

Sipas SPAK rezulton se, Alba Thoma bashkërendonte punën me shtetasin Klodian Zoto, përsa i përket kthimit të pergjigjeve të Ministrisë së Mjedisit në lidhje me kërkesat për plotësimin e kërkesave të duhura në lidhje me procedurën e dhënies së koncesionit.

“Rezulton se shtetasja Alba Thoma, nën cilësinë e Drejtoreshës së Drejtorisë Juridike në Ministrinë e Mjedisit bashkërendonte punën me shtetasin Klodian Zoto, përsa i përket kthimit të pergjigjeve të Ministrisë së Mjedisit në lidhje me kërkesat për plotësimin e kërkesave të duhura në lidhje me procedurën e dhënies së koncesionit”, theksohet në dosje./CNA