web counter
LEXO PA REKLAMA!

SHKARKO APP

App Store
Google Play

E fundit!

x

Anija "Mount Whitney" në Porto Romano/ VanHorn: Simbolizon modernizimin ushtarak të Shqipërisë

10 Shtator 2025, 20:53, Aktualitet CNA

Anija "Mount Whitney" në Porto Romano/ VanHorn: Simbolizon

E Ngarkuara me Punë e SHBA-së në vendin tonë, Nancy VanHorn ka vizituar anijen “Mount Whitney” të ankoruar në Porto Romano.

VanHorn tha se Shtetet e Bashkuara nxisin zhvillimin e një baze detare në Shqipëri me kapacitet portual mallrash në ujëra të thella. Nancy VanHorn deklaroi se përforcimi i Porto Romanos i shërben rajonit dhe Europës.

"Anija e SHBA “Mount Whitney” që ankorohet këtu në Porto Romano simbolizon fazën e radhës të modernizimit ushtarak të Shqipërisë. Shtetet e Bashkuara mirëpresin plotësisht dhe nxisin zhvillimin e një baze detare në Shqipëri me kapacitet portual mallrash në ujëra të thella pikërisht këtu në Porto Romano. Investimi i Shqipërisë në përforcimin e Porto Romanos do t’i tregojë rajonit, dhe të gjithë Europës ,aftësinë e Shqipërisë për të qenë një drejtuese e vërtetë në Aleancën e NATO-s, deklaroi VanHorn.

E ngarkuara me Punë tha se Shqipëria është një aset jetik për NATO-n për shkak të vendndodhjes së saj strategjike.

 

Tashmë, Shqipëria është një aset jetik për NATO-n për shkak të vendndodhjes së saj strategjike. Por, duke përforcuar Porto Romanon dhe duke e lidhur atë me rrugë dhe hekurudha, Shqipëria do të bëhet një rrugë thelbësore për një operacion të mundshëm të ardhshëm në Krahun Lindor të NATO-s.

Përforcimi i Porto Romanos do të ndihmojë në sigurimin e linjave të komunikimit detar dhe në stabilizimin e transportit të materialeve ushtarake përmes kufijve. Gjithashtu, do të dërgojë një sinjal të qartë për të gjithë ata që kërkojnë të destabilizojnë sigurinë transatlantike: Ne jemi të aftë, ne jemi të bashkuar dhe ne jemi të angazhuar ndaj mbrojtjes kolektive në tokë, në ajër dhe në det.

Përtej përfitimeve të sigurisë, përforcimi i Porto Romanos do të kontribuojë për begatinë më të gjerë ekonomike të Shqipërisë – që nga rritja e tregtisë e deri te nxitja e projekteve të reja infrastrukturore që krijojnë vende pune.

Aktualisht, portet në ujëra të thella që u duhen anijeve të marinës së aleatëve si Anija e SHBA “Mount Whitney” për t’u rifurnizuar ose për t’iu siguruar ekuipazheve të tyre pushim dhe çlodhje, janë të pakët në numër në Adriatik.

Përforcimi i Porto Romanos është një aspiratë e madhe, por realiste, aspiratë që kërkon një angazhim të fortë, veçanërisht një investim domethënës të fondeve kombëtare. Në Samitin e NATO-s në Hagë këtë verë, Aleatët u zotuan të shpenzonin 5 përqind të PBB-së për mbrojtjen. Angazhimi i fondeve kombëtare për Porto Romanon do ta sjellë Shqipërinë më pranë këtij angazhimi dhe do të hapë derën edhe për investime shumëkombëshe në Porto Romano, gjithashtu.

Presidenti Trump ka theksuar se të gjithë Aleatët duhet të përmbushin angazhimet e tyre dhe të rrisin shpenzimet për mbrojtje për t’u përballur me sfidat e sotme dhe rreziqet e së nesërmes. Zhvillimi i një objekti portual të ujërave të thella në Porto Romano me kalata të sigurta, me mjedise për trajtimin e ngarkesave dhe me lidhje me hekurudhat e rrugët, ndihmon për t’iu përgjigjur kësaj thirrjeje. Kjo do të përmirësojë sigurinë rajonale, do të forcojë Krahun Lindor të NATO-s dhe do të nxisë rritjen ekonomike," deklaroi VanHorn./CNA

 





Lajmet e fundit nga