3 vende vakante për prokuror në SPAK/ KLP zbulon kriteret dhe dokumentacionin që duhet plotësuar

29 Shtator 2023, 21:57, Aktualitet CNA

3 vende vakante për prokuror në SPAK/ KLP zbulon kriteret dhe

Këshilli i Lartë i Prokurorisë ka shpallur këtë të premte 3 vende vakante në Prokurorinë e Posaçme kundër Korrupsionit dhe Krimit të Organizuar.

KLP liston kriteret që duhet të plotësojnë kandidatët për prokuror në SPAK, ndër të cilat është ushtrimi i detyrës së prokurorit për jo më pak se 10 vjet dhe mospasja e një mase disiplinore në fuqi.

Gjithashtu, në njoftim zbulohet edhe dokumentacioni që duhet të dorëzojë në Këshillin e Lartë të Prokurorisë çdo kandidat.

Kushtet që duhet të plotësojnë kandidatët për prokuror në SPAK:

1. Kanë ushtruar funksionin si prokuror për jo më pak se 10 vjet;

2. Nuk kanë masa disiplinore në fuqi;

3. Japin pëlqimin për kontrollin periodik të llogarive bankare dhe të telekomunikimeve vetjake;

4. Sigurojnë pëlqimin e anëtarëve të afërt të familjes për kontrollin periodik të llogarive bankare dhe të telekomunikimeve vetjake;

Dokumentacioni që kandidatët duhet të dorëzojnë pranë Këshillit të Lartë të Prokurorisë:

1. Një letër motivimi (jo më shumë se 3 faqe A4) ku tregojnë arritjet e tyre më të spikatura në hetimin e korrupsionit dhe krimit të organizuar dhe arsyet e kandidimit;

2. Një CV të përditësuar;

3. Formularët e parashikuar në shtojcat B1 dhe B3 të ligjit 95/2016 “Për organizimin dhe funksionimin e institucioneve për të luftuar korrupsionin dhe krimin e organizuar” të plotësuar rregullisht;

4. Çdo dokumentacion tjetër që kandidati vlerëson të nevojshëm për këtë kandidim.

5. Kopje të Vendimit të Komisionit të Pavarur të Kualifikimit apo Kolegjit të Apelimit nëse kandidati për prokuror në Prokurorinë e Posaçme ka kaluar me sukses procesin e rivlerësimit;

Aplikimet do të dorëzohen në formë elektronike në adresën: [email protected] (në këtë rast të gjitha dokumentet e sipërpërmendura duhet të jenë të skanuara në formatin pdf) ose në formë fizike në adresën: Këshilli i Lartë i Prokurorisë, Rruga “Ana Komnena”, godina “Poli i Drejtësisë”, Ish Fusha e Aviacionit, Tiranë, brenda datës 16.10.2023, ora 24:00./ CNA