Theu 'arrestin e shtëpisë' dhe qarkullonte me armë zjarri/ Kapet 41-vjeçari në Fushë-Krujë

25 Maj 2022, 15:46, Kronika CNA
Theu 'arrestin e shtëpisë' dhe qarkullonte me

Finalizohet operacioni policor i koduar “Alert”, gjatë së cilit u arrestua një 41-vjeçar në Fushë-Krujë, pasi theu masën e sigurisë “Arrest në shtëpi” dhe qarkullonte i armatosur.

Falë informacioneve të marra në rrugë operative, në afërsi të Urës së Gjolës, blutë kapën dhe arrestuan shtetasin me iniciale R. H., 41 vjeç, banues në Fushë-Krujë.

Gjatë kontrollit fizik të tij, punonjësit e Policisë i gjetën në çantë, një armë zjarri pistoletë dhe municion luftarak, të cilat iu sekuestruan në cilësinë e provës materiale.

Për këtë shtetas Gjykata e Shkallës së Parë Durrës kishte caktuar masën e sigurimit “Arrest në shtëpi ”, për veprën penale të “Shkelja e rregullave të mbrojtjes në punë”, dhe “Dhënia ndihmë për ndërtim të paligjshëm”.

Në përfundim të veprimeve, specialistët për Hetimin e Krimit në Komisariatin e Policisë Krujë bënë arrestimin e shtetasit R. H., për veprat penale “Largimi i të burgosurit nga vendi i qëndrimit” dhe “Mbajtja pa leje e armëve, armëve luftarake dhe municionit”.

Gjatë ditës së sotme ka vijuar puna intensive nga ana e strukturave të Policisë së Shtetit dhe si rezultat janë kapur 3 shtetas në kërkim, si dhe është goditur 1 rast i kultivimit të bimëve narkotike dhe i mbajtjes pa leje të lëndëve eksplozive./ CNA.al

Lajmet e fundit nga