Ka pushtuar për më shumë se 40 vite zemrat e publikut/ Janis Parios koncert madhështor në Tiranë

17 Maj 2022, 16:51, Kulturë CNA

Ka pushtuar për më shumë se 40 vite zemrat e publikut/ Janis

Rreth 2000 persona pritet të marrin pjesë në koncertin e këngëtarit të njohur grek Janis Parios që do të mbahet me 22 qershor në Tiranë.

Koncerti do të mbahet në Pallatin e Kongreseve dhe do të ketë formën e një shoë, duke thyer klishetë e performancave të standartizuara.

Parios, do të vijë me Band-in e tij prej 20 instrumentistësh që e shoqëron në të gjithë koncertet dhe turet e tij brenda dhe jashtë Greqisë, duke sjellë kështu një strukturë muzikore profesionale të nivelit ndërkombëtar.

Qëllimi i realizimit të këtij Koncerti, pas një periudhe “izolimi” të diktuar nga pandemia globale, është pasurimi me vlera të vërteta artistike dhe njerëzore i jetës artistike të kryeqytetit, promovimi i Tiranës si qendër e rëndësishme arti në Evropë e Ballkan, pikëtakimi e kulturave dhe traditave, cka garantohet për vetë faktin e ardhjes në Tiranë të një autoriteti artistik si Janis Parios duke e shndërruar Tiranën në qendër të vëmendjes dhe promovimit turistik gjithashtu.

Janis Parios ka punuar me shumë nga kompozitorët kryesorë grekë, duke përfshirë Manos Loizos, Giorgos Hatzinasios, Stavros Xarchakos, Stamatis Spanoudakis, Yorgos Katsaros, Marios Tokas, Yannis Spanos dhe Mikis Theodorakis.

Ai ka shkruar shumë nga tekstet e këngëve të tij dhe ka kompozuar muzikën e tyre. Një sërë këngësh të tij janë përkthyer dhe kënduar jashtë vendit.

Një nga publikimet e tij mban rekordin për shitjet greke (një milion e katërqind mijë disqe është albumi “Nisiotika”, i publikuar në vitin 1982.

Ai ka performuar edhe jashtë Greqisë, në Royal Albert Hall, Carnegie Hall, në Kanada, Australi, Shtetet e Bashkuara, Gjermani, Belgjikë, Zvicër, Turqi dhe Izrael.

Stili i tij i veçantë plot thellësi, melankolik dhe emocion shpërthyes ka pushtuar për më shumë se 40 vite zemrat dhe admirimin e publikut dhe ka ndërtuar një librari muzikore prej më shumë se 40 disqe shumë prej të cilave kanë fituar Çmime dhe Vlerësime ndërkombëtare.

Njihet si “këngëtari i dashurisë” dhe është protagonist edhe në bashkëpunime me këngëtarë të tjerë të njohur të muzikës greke./CNA.al