LEXO PA REKLAMA!

SHKARKO APP

Sfidon ish-lojtarin e tij, Josa: Shkëmbin nuk e shoh si nxënës

3 Dhjetor 2021, 09:00, Sport CNA

Mirel Josa nuk e shikon përballjen me Dinamon si një duel me trajnerin Bledi Shkëmbi, madje në intervistën e dhënë për ?Panorama Sport? pohoi se ish-kapitenin e Skënderbeut nuk e konsideron as si nxënësin e tij, edhe pse e ka trajnuar në Korçë. Po, pasi mendohet, lë të kuptojë se duke ditur se Shkëmbi e njeh stilin dhe mentalitetin e tij si trajner, edhe mund të ndikojë te ndeshja e sotme.

Josa pohoi se humbja në Shkodër nuk ka asnjë lidhje me përballjen me dinamovitët, ku kërkon që të besuarit e tij të marrin maksimumin. Trajneri i skuadrës kurbinase foli edhe për gjendjen e ekipit, ku kthehet Lushkja nga pezullimi, si dhe Mazrekaj pritet të jetë gati për sot. Josa tha se nuk i druhet Dinamos për asgjë, vetëm shpreson që ekipi i tij të tregojë potencialin që mbart. Në fund foli edhe për ngjeshjen e kalendarit, moment i cili tregon cilësitë dhe forcën që kanë klubet.

Sa ndikon humbja me Vllazninë në ndeshjen e sotme, ku Laçi pret Dinamon?

Nuk ka lidhje fare humbja në Shkodër me ndeshjen ndaj Dinamos, pavarësisht se skuadra jonë shkoi për të marrë rezultat pozitiv në transfertë me Vllazninë, ku bëmë ato që bëmë. Laçi hyn për fitore në çdo ndeshje, pavarësisht si del rezultati, me kushtet e lojës apo si do të zhvillohet ajo. Kështu që, nuk duhet të lidhet fare ndeshja që zhvilluam në Shkodër me atë që kemi me Dinamon. Janë ndeshje komplet të ndryshme. Janë kundërshtarë të ndryshëm, ndaj për mua humbja në këtë takim nuk ka asnjë lloj ndikimi.

Ekipin pritet që ta keni në një formë më të mirë këtë javë, pasi Lushkja kthehet nga pezullimi. Si është gjendja e Mazrekajt dhe a pritet të jetë ndaj dinamovitëve?

Sa i përket Mazrekajt, do të shohim edhe nesër (sot) se si do të jetë gjendja e tij dhe do të vendosim. Në dy stërvitjet e fundit ai ka marrë pjesë dhe është stërvitur me ekipin. Siç e përmendët na kthehet edhe Lushkja, por çdo skuadër ka problemet e veta. Kështu që, e para e punës është sedo të mundohemi të mos kemi probleme. Ndërsa e dyta është se edhe po të kemi probleme do të mundohemi që t?i zëvendësojmë më së miri me lojtarët e tjerë.

Duke ditur se përballë keni një ish-nxënësin tuaj te Skënderbeu, Bledi Shkëmbi, që është trajner i Dinamos dhe jua njeh mentalitetin, mund t?ju hapë punë kjo gjë, pasi ai jua njeh stilin tuaj të lojës?

Unë nuk i marr ndeshjet kështu, si përballja ime me trajnerin e Dinamos. Fundja, unë s?e kam konsideruar që Shkëmbi është nxënësi im. Sa i përket njohjes së stilit të lojës, edhe mundet të jetë e tillë. Unë e shikoj ndeshjen në drejtim tjetër, ku përballen dy skuadra që do të kërkojnë fitoren, qoftë Laçi që luan në shtëpinë e vet apo Dinamo.

Në këtë periudhë nis ngjeshja e kalendarit, me dy ndeshje në një javë. A i ka mundësitë ekipi që ju drejtoni dhe vetë futbolli shqiptar që ta përballojë këtë ngarkesë?

Nuk është hera e parë që po luhet në këtë formë. Unë mund të flas për skuadrën që drejtoj, ku ka pozicione që edhe mund të mos i kemi të mbuluara nëse do të kemi ndonjë problem fizik nga lojtarët apo pezullime nga kartonët. Këto janë probleme që çdo skuadër i ka, por unë kam besim te futbollistët e mi që dinë t?i menaxhojnë mirë situatat, plus që në ndihmë të tyre vijmë edhe ne si drejtues. Sa i përket ngjeshjes, ajo nuk ndodh vetëm në kampionatin shqiptar, por edhe në kampionate të tjera ndërkombëtare. Kjo do të varet dhe do të tregojë se çfarë cilësie kanë skuadrat. Përjashto dy ekipe, të gjitha të tjerat mund të themi se janë aty-aty.

A keni diçka që i druheni tek ekipi i Dinamos përpara duelit të sotëm?

Ndrojtje nuk kam. Mua më intereson që lojtarët e mi të jenë në gjendje të mirë dhe të japin 100% nga vetja. Janë dy skuadra që janë ndërtuar për të fituar, ndaj nuk kam asnjë ndrojtje në këtë drejtim.

Lajmet e fundit nga