web counter
LEXO PA REKLAMA!

SHKARKO APP

App Store
Google Play

Sulmet në veri të Kosovës/ Osmani: Synime ruso-serbe për destabilizim, ndërkombëtarët të mos i injorojnë

25 Shtator 2021, 14:39, Kosova & Bota CNA

Presidentja e Kosovës, Vjosa Osmani ka deklaruar se sulmet e fundit ndaj institucioneve publike në veri të vendit tregojnë se Serbia dhe regjimi hegjemonist i Vuçiçit janë burimi kryesor i destabilizimit në rajon.

Presidentja është shprehur se ndërkombëtarët nuk duhet ta injorojnë tendencën ruso-serbe për destabilizim.

Më tej Osmani ka theksuar se është koha që BE dhe NATO ta shohin këtë rrezik dhe ta ndalojnë regjimin e Vuçiçit.

“Sulmet e fundit ndaj institucioneve publike në veri të vendit nga strukturat kriminale dhe ilegale të mbështetura nga Serbia janë dëshmia kryesore për atë që po e themi që moti: Serbia dhe regjimi hegjemonist i Vuqiqit janë burimi kryesor i destabilizimit në rajon, i cili po synon zhbërjen e arritjeve të aleatëve tanë amerikanë dhe evropian në Kosovë e rajon.

Bashkësia ndërkombëtare nuk duhet ta injorojë atë që shihet qartë – tendencën ruso-serbe që nëpërmjet destabilizimit të rajonit tonë, ta dëmtojë edhe vetë Bashkimin Evropian dhe NATO-në, si bashkim e sistem vlerash. Në Kosovë, Mal të Zi dhe Bosnje dhe Hercegovinë po përdoret i njëjti model destabilizues, të cilin Rusia përdorë në shtetet baltike, Ukrainë, Moldavi dhe Gjeorgji.

Ndaj, është koha që bashkësia ndërkombëtare, e para se gjithash shtetet anëtare të BE-së dhe NATO-s, ta shohin këtë rrezik e ta ndalojnë regjimin e Vuqiqit në realizimin e synimit të tij për krijimin e ?botës serbe?, që i përket logjikës së viteve të 90-ta në Serbi.

Ftoj qytetarët e Republikës së Kosovës, në veçanti serbët e Kosovës që të jenë të bashkuar në refuzimin e skenarëve ogurzi të Serbisë. Institucionet e Kosovës do të vazhdojnë të jenë pranë tyre duke ofruar mbështetje dhe siguri nga strukturat kriminale dhe ilegale të Serbisë”, ka shkruar Osmani./ CNA.al





Lajmet e fundit nga